Lorenzo Natali Media Mükafatı üçün ərizə qəbuluna başlandı

Avropa İttifaqının (Aİ) jurnalistlərə təqdim etdiyi əsas mükafatlardan biri olan Lorenzo Natali Media Mükafatı üçün ərizələrin qəbuluna başlanıb. Mükafat dünyanın istənilən yerində çalışan və ən aktual qlobal problemləri işıqlandıran jurnalistlərə təqdim olunur.

Avropa Komissiyası qeyri-bərabərlik, yoxsulluğun azaldılması, dayanıqlı inkişaf, ətraf mühit, biomüxtəliflik, iqlim dəyişikliyi, rəqəmsallaşdırma, iş və məşğulluq, təhsil və bacarıqların inkişafı, miqrasiya, səhiyyə, sülh, demokratiya və insan hüquqları mövzularında məqalə yazan və reportaj hazırlayan jurnalistləri onlayn qaydada müraciət etməyə çağırır.

Jurnalistlər məqalə, audio-vizual və ya multimedia işlərini aşağıdakı nominasiyalardan biri üzrə təqdim edə bilərlər:

• Beynəlxalq mükafat: Avropa İttifaqına tərəfdaş ölkələrdən birində (bütün Şərq Tərəfdaşlıq ölkələri daxil olmaqla) fəaliyyət göstərən kütləvi informasiya vasitəsində dərc olunan məqalələr.
• Avropa mükafatı: Avropa İttifaqına üzv dövlətlərdən birində yerləşən kütləvi informasiya vasitəsində dərc olunan məqalələr.
• Gənc jurnalistlər nominasiyası: 30 yaşdan gənc jurnalistin təqdim etdiyi məqalələr.

İngilis, Fransız, İspan, Alman və Portuqal dillərindən hər hansı birinə tərcümə ilə müşayiət olunmaq şərtilə, istənilən dildə dərc olunan məqalə və reportajlar təqdim oluna bilər. 

Qaliblərin hər biri 10 000 avro ilə mükafatlandırılacaq. Gənc jurnalistlər nominasiyasının qalibinə media tərəfdaşlarından birində təcrübə keçmək imkanı veriləcək.

Qaliblər 2023-cü ilin sonunda Brüsseldə keçiriləcək mükafatlandırma mərasimində elan ediləcək.

Müraciətlərin təqdim olunması üçün son tarix 28 apreldir.

Daha çox öyrən

Mətbuat üçün açıqlama

Lorenzo Natali Media Mükafatı üçün buradan müraciət edin

Lorenzo Natali Media Mükafatının internet səhifəsi