İrlandiya Aİ Şurasına sədrliyi dövründə Ukrayna və namizəd ölkələrə dəstək verəcəyini bəyan edib

İyul ayının 1-dən İrlandiya səkkizinci dəfə Avropa İttifaqı Şurasına sədrlik etməyə başlayıb. İrlandiya sədrlik missiyasını Kiprdən təhvil alıb və 2027-cı il yanvarın 1-də Litvaya təhvil verəcək.

İrlandiyanın Baş naziri Mişel Martin Dublin qəsrində keçirilən rəsmi mərasimdə ölkəsinin Avropa İttifaqı Şurasına sədrliyə başlamasını alqışlayıb.

“Biz növbəti altı aya qətiyyət, nikbinlik və əzmkarlıq ruhu ilə addımlayırıq. Eyni zamanda, Aİ-nin ilk növbədə hansı məqsədlə – dinc, azad və çiçəklənən, bu dəyərlərin azlığın imtiyazı deyil, hamının hüququ olduğu bir qitə yaratmaq üçün bir araya gəldiyini xatırlayırıq”, – Mişel Martin bildirib.

O, həmçinin İrlandiyanın rəhbərlik etdiyi Aİ Şurasının “öz ölkələrini müdafiə edərkən böyük rəşadət və əzmkarlıq nümayiş etdirən Ukrayna xalqına” güclü dəstək nümayiş etdirməyə davam edəcəyini qeyd edərək ukraynalıların “ədalətli və davamlı sülhə layiq” olduqlarını vurğulayıb.

Onun sözlərinə görə, Şura həmçinin Avropa İttifaqına üzv olmaq istəyən ölkələrin üzvlük yolunda irəliləmələrini dəstəkləyəcək və bu da ittifaqın “qonşuluğunda daha böyük rifah və sabitliyin təmin olunmasına kömək edəcək”.

Daha çox öyrənin

Mətbuat üçün açıqlama

Baş nazir Mişel Martinin çıxışı