YEA10: Gənc Avropa səfirləri şəbəkəsinin 10 illiyi qeyd olunur

On il əvvəl 16 iyun 2016-cı il tarixində altı tərəfdaş ölkədən (Azərbaycan, Ermənistan, Belarus, Gürcüstan, Moldova və Ukrayna) və Avropa İttifaqından (Aİ) olan ilk 100 gəncin iştirakı ilə “Gənc Avropa səfirləri” (YEA) şəbəkəsinin əsası qoyulub. Fəaliyyətə başladığı ilk ildə şəbəkə tərəfindən 7 tədbir təşkil olunub və bu təşəbbüslər 7000 nəfəri əhatə edib. Bu gün isə bu şəbəkənin sıralarında region üzrə 20 milyon insanı əhatə edən 7000-dən çox layihədə iştirak etmiş 3000-dən artıq gənc birləşib.

“EU NEIGHBOURS east” layihəsi bu şəbəkənin onilliyini qeyd etmək məqsədilə regionda mühüm dəyişikliklərə şahidlik etmiş, öz icmalarında Aİ-nin dəstəyi barədə məlumatlılığı artıran və Avropa dəyərlərini təşviq edən istedadlı gənc Avropa səfirlərinin səsini və nailiyyətlərini tanıtmaq məqsədilə genişmiqyaslı kampaniyaya start verir.

Ötən onillik ərzində Gənc Avropa səfirləri Aİ-nin şərq qonşuları ilə tərəfdaşlığı, dəyərləri və daha yaxşı gələcək üçün yaradılan imkanlar barədə ictimaiyyəti məlumatlandırıblar. Onlar demokratiya, ətraf mühitin mühafizəsi və gender bərabərliyi sahəsində kampaniyalar həyata keçiriblər. Gənclər bir-birinin mübarizəsinə həmrəylik nümayiş etdirərək yorulmadan, çiyin-çiyinə çalışıb və gələcəyə hədəflənən davamlı əlaqələr qurublar. 

Önümüzdəki aylar ərzində Gənc Avropa səfirləri ötən onilliyin mirasını və qazanılan uğurları müxtəlif layihələrlə diqqət mərkəzində saxlayacaqlar:

• “YouTube” platformasında yayımlanacaq müsahibələr silsiləsində şəbəkənin məzunları öz YEA təcrübələrindən, qazandıqları biliklərdən və Aİ dəstəyinin yerlərdə yaratdığı real təsirlərdən bəhs edəcəklər.
• Tərəfdaş ölkələrdəki Aİ səfirləri ilə keçiriləcək görüşlərdə şəbəkənin qoyduğu miras, Aİ-nin yerlərdəki praktiki fəaliyyəti, formalaşan yeni münasibətlər və gələcək perspektivlər müzakirə olunacaq.
• Sosial media platformalarında gənclər ölkədən-ölkəyə ötürülən xüsusi səyahət gündəliyinin rəqəmsal təqdimatını edəcək və bu onlayn estafetdə fəal iştirak edəcəklər. Yerlərdə şəbəkənin onilliyinə həsr olunmuş tədbirlər “reels”, postlar, karusellər və digər vizual formatlar vasitəsilə geniş şəkildə işıqlandırılacaq.
• YEA jurnalının xüsusi 2026-cı il buraxılışı onillik fəaliyyətin uğurlarına həsr olunacaq və Avropanın gələcəyinə işıq salacaq.
• “EU NEIGHBOURS east” layihəsinin internet saytında yaradılmış kampaniyanın səhifəsində məzunların uğur hekayələri təqdim ediləcək, bütün rəqəmsal materiallar və Aİ-nin gənclər üçün mövcud olan imkanlarına dair keçidlər yerləşdiriləcək.

Hazırda regionda və Aİ məkanında fəaliyyət göstərən şəbəkənin 1000-ə yaxın fəal üzvü var. Onlar Ukrayna ilə həmrəyliyi qoruyub saxlayır, təşkilatın genişlənmə prosesini dəstəkləyir, Aİ-nin imkanları barədə məlumatlılığı artırır, eləcə də Belarus və Gürcüstanda demokratiya və insan hüquqları uğrunda aparılan mübarizəyə diqqət çəkirlər. 

Gələcəyin onillik əməkdaşlıq, ilham və dəyişiklik mərhələsinə zəmin hazırlamaq üçün həmrəylik, məlumatlılıq, şəbəkələşmə və yeni imkanların yaradılması istiqamətində hər gün yeni fəaliyyətlər təşkil olunmaqdadır.

Daha çox öyrənin

YEA10 kampaniyasının səhifəsi

Gənc Avropa səfirləri

EU NEIGHBOURS east layihəsi