Avropa Təlim Fondu Aİ-nin Qonşuluq ölkələrində gəncləri səlahiyyətləndirmək üçün #MySkills4You təşəbbüsünə start verib

Dekabrın 4-də Avropa Təlim Fondu (ETF) #MySkills4You heşteqli sosial media kampaniyasına başlayıb. Kampaniya Cənub və Şərqi Qonşuluq ölkələrində, eləcə də Qərbi Balkanlarda gənclərin səsini ucaltmaq və Avropa Bacarıqlar İlində gənclərə dair müzakirələrə töhfə vermək məqsədi daşıyır. 

Təşəbbüs çərçivəsində gənclərin öz ölkələrində tənqidi bacarıqlarının inkişafı ilə bağlı fikirlərini işıqlandıran dinamik videoçarxlar hazırlanacaq. Bundan əlavə, ETF 16-28 yaş arası şəxslərin bacarıqlarının inkişafını dəstəkləmək üçün yaşadıqları ölkələrdə bu sahədə hansı tədbirlərin görüldüyünü öyrənmək üçün onlarla birgə işləyəcək.

2024-cü ilin aprel ayına qədər davam edəcək kampaniyada müvafiq regionda çoxlu sayda müxtəlif bacarıq və istedadların inkişafını əks etdirən hərtərəfli fəaliyyət daxildir.  

Şərq Tərəfdaşlığı regionundan olan iştirakçılar arasında Azərbaycanda ictimai nitq və STEM üzrə mütəxəssis olan Nərgiz Əliyeva da var. 

Avropa Bacarıqlar İli rəqəmsal və yaşıl texnologiyalar üzrə bacarıqları diqqət mərkəzində saxlamaqla Avropa İttifaqındakı bacarıqlar sahəsindəki boşluğu aradan qaldırmaq və Aİ-nin bacarıqlara dair strategiyasını gücləndirmək məqsədi daşıyır. Avropa Bacarıqlar İlində Avropada bacarıqlarla bağlı tədbir və fəaliyyətlərin dəstəklənməsi, təlimlərin keçirilməsinə sərmayə qoyuluşunun təşviqi, o cümlədən bacarıqların işəgötürənlərin ehtiyaclarına uyğunluğunun təmin edilməsi və Aİ hüdudlarından kənarda tələb olunan bacarıqlara malik insanların cəlb edilməsi nəzərdə tutulub.

Avropa Təlim Fondu (ETF) Avropa İttifaqının qonşu ölkələrdə təhsil, təlim və əmək bazarı sistemlərində islahatların aparılmasında dəstək verən bir qurumudur. 

Daha çox öyrən

Mətbuat üçün açıqlama

#MySkills4You kampaniyası

MySkills4You – Videoçarxlar