Avropa Komissiyası yeni sərhəd nəzarəti sisteminin oktyabrın 12-dən etibarən tətbiq olunmasına qərar verib

İyulun 30-da Avropa Komissiyası Aİ-nin yeni giriş-çıxış sisteminin oktyabr ayının 12-dən mərhələli şəkildə tətbiq olunmasına qərar verib.

Bu qabaqcıl texnoloji sistem Aİ-yə üzv olmayan ölkələrin vətəndaşlarının 29 Avropa ölkəsinə, o cümlədən Şengen zonasına qısamüddətli səfərləri zamanı onların giriş-çıxışını rəqəmsal şəkildə qeydə alacaq. Sistem vasitəsilə biometrik məlumatlar, yəni barmaq izləri və üz təsvirləri və digər səyahət məlumatları toplanacaq və tədricən hal-hazırda tətbiq olunan pasportların möhürlənməsi sistemini əvəz edəcək.  

Bu sistem Aİ-nin xarici sərhədlərində giriş-çıxışın müasirləşdirilməsinə və təkmilləşdirilməsinə imkan verəcək. O, sərhəd buraxılışı haqqında etibarlı məlumatlar təmin etməklə yanaşı, müddətdən artıq qalma və sənədlərin saxtalaşdırılması hallarını sistemli şəkildə müəyyən edəcək. 

Məlumatların və məxfiliyin mühafizəsi üzrə yüksək standartlara cavab verən bu sistem səyahət edən şəxslərin fərdi məlumatlarının etibarlı şəkildə qorunmasını təmin edəcək. 

İttifaqa üzv dövlətlər sözügedən sistemi 12 oktyabr tarixindən başlayaraq altı ay ərzində tədricən tətbiq etməyə başlayacaq. Bu müddət başa çatdıqdan sonra sistemin bütün sərhəd buraxılışı mıntəqələrində tam şəkildə tətbiq olunması planlaşdırılır.

Daha çox öyrən

Mətbuat üçün açıqlama