უკრაინა: ევროკავშირმა რუსეთის წინააღმდეგ სანქციების მეცხრე პაკეტი დაამტკიცა
დეკემბერი 16, 2022

უკრაინა: ევროკავშირმა რუსეთის წინააღმდეგ სანქციების მეცხრე პაკეტი დაამტკიცა


ევროკავშირმა რუსეთის მიერ უკრაინის წინააღმდეგ მიმართული აგრესიის საპასუხოდ სანქციების მეცხრე პაკეტი მიიღო. 

ევროკომისიის მიერ შეთავაზებული ეს პაკეტი რუსეთის მიერ უკრაინაში წარმოებული არაკანონიერი ომის საპასუხოდაა მიმართული. კერძოდ, რუსეთი მხილებულია მშვიდობიან მოსახლეობასა და სამოქალაქო ინფრასტრუქტურაზე მიზანმიმართულ შეტევებში, რომლის მიზანიც ზამთრის დასაწყისში ქვეყნის პარალიზებაა. 

ევროკავშირმა სანქცირებულთა სიაში დამატებით თითქმის 200 ინდივიდი და ორგანიზაცია შეიყვანა. მათ შორისაა რუსეთის შეიარაღებული ძალები, ცალკეული ოფიცრები, თავდაცვითი სამრეწველო კომპანიები, სახელმწიფო დუმის და ფედერაციის საბჭოს წევრები, მინისტრები, გუბერნატორები და პოლიტიკური პარტიები. სია მოიცავს ფიგურებს, რომლებიც არსებით როლს ასრულებენ სამოქალაქო მოსახლეობაზე სასტიკ და მიზანმიმართულ სარაკეტო თავდასხმებში, უკრაინელი ბავშვების რუსეთში გატაცებაში და უკრაინული სასოფლო-სამეურნეო პროდუქტების მოპარვაში.

ახალი საექსპორტო შეზღუდვები დაუწესდა იმ ორმაგი დანიშნულების პროდუქციასა და მოწინავე ტექნოლოგიას, რომლებიც რუსულ სამხედრო შესაძლებლობებს განამტკიცებს. ამაში შედის დრონის ძრავები, საკამუფლაჟო აღჭურვილობა, დამატებითი ქიმიური/ბიოლოგიური ხელსაწყოები, მასობრივი არეულობების აღსაკვეთი ნივთიერებები და ის დამატებითი ელექტრონული კომპონენტები, რომლებსაც რუსული არმია იყენებს. 

ახალი საექსპორტო აკრძალვები გაფართოვდება და მოიცავს ისეთ დამატებით ინდუსტრიულ პროდუქციასა და ტექნოლოგიას, როგორიცაა სათამაშო/სამოყვარულო დრონები, კომპლექსური გენერატორები, ლეპტოპები და კომპიუტერის კომპონენტები, ნაბეჭდი პლატები, რადიო-სანავიგაციო სისტემები, დისტანციური მართვის რადიოაპარატები, საავიაციო ძრავები და ძრავების, კამერებისა თუ ლინზების ნაწილები.

სანქციები შეეხო დამატებით სამ რუსულ ბანკს. ამ შეზღუდვებში რუსეთის რეგიონული განვითარების ბანკისთვის ტრანზაქციების სრულად აკრძალვაც შედის. 

ევროკავშირში აიკრძალა დამატებით ოთხი რუსული არხი: „ენტევე“/„ენტევე მირი“, „როსია 1“, „რენ ტევე“ და „პერვი კანალი“

ამასთან, აიკრძალება ევროკავშირის ახალი ინვესტიციები რუსეთის სამთო მრეწველობის სექტორში, თუმცა გამონაკლისი შეეხება კონკრეტულ ნედლეულს. 

სანქციების მეცხრე პაკეტის დაწესებამდე ასევე სრულად აიკრძალა რუსული საზღვაო ნედლი ნავთობის ევროკავშირში იმპორტი. დიდი შვიდეულის ქვეყნებმა კი ნავთობის გლობალურ ფასზე ზედა ზღვარი დააწესეს. ორივე გადაწყვეტილება 5 დეკემბრიდან ამოქმედდა. 

დამატებითი ინფორმაცია

პრესრელიზი

ამავე თემაზე: ევროკომისიამ რუსეთის წინააღმდეგ სანქციების მეცხრე პაკეტის დაწესების წინადადება წამოაყენა



ყველაზე წაკითხული


თემაზე

ივნისი 20, 2024

ევროკავშირის სწავლა-სწავლების პროცესში ხელოვნური ინტელექტისა და მონაცემების გამოყენების ეთიკური გზამკვლევი ქართულადაც გამოიცა

ივნისი 18, 2024

ევროპის რეკონსტრუქციისა და განვითარების ბანკს თურქეთსა და კავკასიაში ახალი მმართველი დირექტორი ჰყავს

ივნისი 18, 2024

ევროკავშირის უმაღლესი რანგის ოფიციალური პირები საქართველოს ევროპული მომავლისადმი სალომე ზურაბიშვილის ერთგულებას მიესალმებიან

ივნისი 18, 2024

„უცხოელი აგენტების კანონი“: საქართველოს სამინისტროებს სამოქალაქო სექტორზე 10-ჯერ მეტი დაფინანსება აქვს ევროკავშირისგან მიღებული

ივნისი 14, 2024

ევროკავშირი საქართველოში ციფრული ჩართულობით სოფლის გაძლიერების ახალ პროექტს იწყებს


გაინტერესებთ უკანასკნელი ცნობები და შესაძლებლობები?

ამ ვებსაიტს მართავს ევროკავშირის მიერ დაფინანსებული აღმოსავლეთ სამეზობლოს რეგიონული საკომუნიკაციო პროგრამა („EU NEIGHBOURS east“) 2020-2024. ეს პროგრამა ავსებს და მხარს უჭერს ევროკავშირის წარმომადგენლობების კომუნიკაციას აღმოსავლეთ პარტნიორობის ქვეყნებში; ის მოქმედებს სამეზობლო პოლიტიკის და გაფართოებაზე მოლაპარაკებების საკითხებში ევროკომისიის გენერალური დირექტორატის და ევროპული საგარეო ქმედებათა სამსახურის ხელმძღვანელობით. პროგრამას ახორციელებს კომპანიის GOPA PACE კონსორციუმი.


ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით. © European Union,