ირლანდია ევროკავშირის საბჭოს თავმჯდომარეობის მიღებისას უკრაინასა და სხვა კანდიდატ ქვეყნებს მხარდაჭერას აღუთქვამს

1 ივლისს ირლანდიამ ევროკავშირის საბჭოს თავმჯდომარე ქვეყნის როლი რიგით მერვედ მიიღო. ირლანდიამ თავმჯდომარეობა კვიპროსისგან ჩაიბარა და ამ როლს 2027 წლის 1 იანვარს ლიეტუვას გადააბარებს.

ირლანდიის პრემიერ-მინისტრმა, მიჰოლ მარტინმა დუბლინის ციხესიმაგრეში გამართულ ცერემონიაზე ირლანდიის მიერ ევროკავშირის საბჭოს თავმჯდომარეობის პერიოდის ოფიციალური დაწყება აღნიშნა.

„ჩვენ მომდევნო ექვს თვეს მიზანდასახულობით, პოზიტიურობითა და სიმტკიცით შევყურებთ და ვიაზრებთ, რატომ შეიქმნა ევროკავშირი – რათა ევროპა ქცეულიყო კონტინენტად, სადაც მშვიდობა, თავისუფლება და კეთილდღეობა არის არა რჩეულთა პრივილეგია, არამედ ყველას უფლება“, – განაცხადა მიჰოლ მარტინმა.

მან ასევე აღნიშნა, რომ ირლანდიის თავმჯდომარეობით ევროკავშირის საბჭო ურყევად გააგრძელებს უკრაინის მხარდაჭერას, „რომლის ხალხმაც თავისი ქვეყნის დაცვისას სიმამაცე და მიზანდასახულობა გამოიჩინა“, რასაც დაურთო, რომ „ისინი სამართლიან და მტკიცე მშვიდობას იმსახურებენ“.

საბჭო ასევე მხარს დაუჭერს იმ ქვეყნებს, რომელთაც ევროკავშირში შესვლა სურთ და წევრობისკენ გზას მიუყვებიან. „ეს ჩვენს სამეზობლოში მეტი კეთილდღეობისა და სტაბილურობის უზრუნველყოფას დაეხმარება“, – აღნიშნა მიჰოლ მარტინმა.

დამატებითი ინფორმაცია

პრესრელიზი

პრემიერ-მინისტრის, მიჰოლ მარტინის მისასალმებელი გზავნილი