İrəvanda Avropa Siyasi Birliyinin zirvə toplantısı keçirilib − Antonio Koşta: “Bu görüş Qafqazda sülh sammiti kimi yadda qalacaq” 

Mayın 4-də İrəvanda “Gələcəyin qurulması: Avropada birlik və sabitlik” şüarı altında Avropa Siyasi Birliyinin (ASB) səkkizinci zirvə toplantısı keçirilib. Tədbirdə qitənin və digər ölkələrin 40-dan çox dövlət və hökumət başçısı iştirak edib. İlk dəfə olaraq Avropa Siyasi Birliyinin zirvə toplantısına qeyri-Avropa ölkəsinin nümayəndəsi qoşulub. Belə ki, Kanadanın Baş naziri Mark Karni toplantıda qonaq qismində iştirak edib.

Liderlər demokratik dayanıqlığın gücləndirilməsi, əlaqələrin inkişaf etdirilməsi, habelə iqtisadi və enerji sahəsində təhlükəsizliyin möhkəmləndirilməsi istiqamətində əməkdaşlıq və birgə fəaliyyət məsələlərini müzakirə ediblər.

Zirvə toplantısına Avropa İttifaqı Şurasının Prezidenti Antonio Koşta və Ermənistanın Baş naziri Nikol Paşinyan həmsədrlik ediblər.

Antonio Koşta bu görüşün tarixi əhəmiyyətini xüsusi vurğulayıb.

“Bu tarixi hadisədir, çünki Avropa Siyasi Birliyi ilk dəfədir ki, burada — Cənubi Qafqazda toplanır, çünki Ermənistanın qədim və zəngin tarixə malik olması onun Avropanın mərkəzində yer almasını təmin edir”, — deyə Antonio Koşta bildirib.

O, həmçinin toplantının Azərbaycan Prezidenti İlham Əliyevin videokonfrans vasitəsilə iştirakı ilə başladığını diqqətə çatdırıb. “Bu o deməkdir ki, cəsarətli siyasi seçimlər və səbirli diplomatik səylər nəticəsində ərsəyə gələn bu zirvə toplantısı Qafqazda sülh sammiti kimi əbədi yadda qalacaq”, — Antonio Koşta əlavə edib.

O, həmçinin Avropa İttifaqının sülh və sabitlik naminə Ermənistan və regionla işləməyə hazır olduğunu vurğulayıb. O, sabitliyin dayanıqlı demokratik təsisatlara və qonşular arasındakı güclü iqtisadi əlaqələrə əsaslanmalı olduğunu diqqətə çatdırıb.

İrəvanda baş tutan zirvə toplantısına Ukrayna Prezidenti Volodimir Zelenski də qoşulub. Antonio Koşta Ukraynaya dəstəyin “Avropa Siyasi Birliyinin əsas diqqət mərkəzində olduğunu” qeyd edərək bu mesajları çatdırıb: “Birincisi, Avropa İttifaqı Ukraynanın ərazi bütövlüyünə tam hörmət edilməklə, davamlı və ədalətli sülh əldə olunana qədər onun yanında olacaq. İkincisi, biz ən qısa zamanda ilk danışıqlar klasterini açmaqla Ukraynanın üzvlük prosesini irəli aparmalıyıq”.

Avropa Siyasi Birliyi 2022-ci ildən etibarən səkkiz dəfə toplanıb. Qurumun məqsədi ümumi maraq doğuran məsələlərin həlli, Avropa qitəsində təhlükəsizlik, sabitlik və rifahın gücləndirilməsi üçün siyasi dialoq və əməkdaşlığı təşviq etməkdir.

Növbəti toplantıların 2026-cı ilin noyabrında İrlandiyada, 2027-ci ilin aprelində isə İsveçrədə keçirilməsi planlaşdırılır.

Daha çox öyrənin

Mətbuat üçün açıqlama

Avropa Siyasi Birliyinin zirvə toplantısından sonra qurumun prezidenti Antonio Koştanın mətbuat üçün bəyanatı