სალომე ზურაბიშვილი ბრიუსელში ევროკავშირის უმაღლესი რანგის ოფიციალურ პირებს ხვდება

2 ოქტომბერს ბრიუსელში საქართველოს პრეზიდენტი, სალომე ზურაბიშვილი ევროპული საბჭოს პრეზიდენტს, შარლ მიშელსა და ევროკომისიის პრეზიდენტს, ურსულა ფონ დერ ლაიენს შეხვდა. 

„როგორც კანდიდატმა ქვეყანამ, საქართველომ უნდა გააღრმაოს რეფორმები ჩვენი საერთო დემოკრატიული ღირებულებების შესაბამისად“,  – დაწერა შარლ მიშელმა შეხვედრის შემდეგ  X-ზე,  – „რეფორმები, კანონის უზენაესობა და დემოკრატიული პრინციპები ევროკავშირისკენ მიმავალი გზის საფუძველია“. 

მან ასევე დაურთო, რომ საქართველოს მომავლის განსაზღვრა მხოლოდ საქართველოში და ქართველი ხალხის მიერაა შესაძლებელი.

ურსულა ფონ დერ ლაიენის განცხადებით, ის დიდად აფასებს იმას, თუ როგორ ერთგულობს სალომე ზურაბიშვილი საქართველოს ევროკავშირისკენ მიმავალ გზას. 

„ჩვენი შეხვედრა მნიშვნელოვან დროს იმართება – მომავალი არჩევნები გადამწყვეტი გამოცდა იქნება საქართველოს დემოკრატიისათვის და ევროკავშირი-საქართველოს ურთიერთობების მომავლისათვის“,  – დაწერა ფონ დერ ლაიენმა X-ზე. 

თავის მხრივ, ზურაბიშვილმა აღნიშნა, რომ ევროპის მორალური მხარდაჭერა გადამწყვეტი იქნება, რათა „ქართველმა ხალხმა არ იგრძნოს თავი იზოლირებულად, როცა 26 ოქტომბერს თავის ევროპულ არჩევანს გააკეთებს“. 

დამატებითი ინფორმაცია

შარლ მიშელის პოსტი X-ზე

ურსულა ფონ დერ ლაიენის პოსტი X-ზე