EU4IM ჟურნალისტებისა და მედიამენეჯერებისთვის ონლაინკურსებს იწყებს

ევროკავშირის მიერ დაფინანსებული EU4Independent Media („ევროკავშირი დამოუკიდებელი მედიისთვის“) ჟურნალისტებისა და მედიამენეჯერებისთვის ონლაინკურსების სერიას იწყებს. თითოეული კურსი თვითმართულია, რაც იმას ნიშნავს, რომ მათი გავლა თქვენთვის სასურველ დროსა და ტემპში შეგიძლიათ. 

EU4IndependentMedia პროექტის მიზანი აღმოსავლეთ პარტნიორობის ქვეყნებში მოქმედი დამოუკიდებელი, კომერციული მედიის ფინანსური მდგრადობის გაუმჯობესებაა.

პროექტის მიერ შემუშავებული ონლაინრესურსები მედიაორგანიზაციებს ეხმარება, დახვეწონ მენეჯერული და სარედაქციო საქმიანობა. ინიციატივა ასევე გვერდში უდგას პოლიტიკურად და ეკონომიკურად მერყევ გარემოში მომუშავე ჟურნალისტებს — განსაკუთრებით იმ რეპორტიორებს, რომლებიც უკრაინაში მიმდინარე ომს აშუქებენ. 

მაგალითად, ომის გაშუქებასა და რისკის შეფასებაზე კონცენტრირებული ონლაინკურსები შეიმუშავა კრის ბუთმა, BBC მოსკოვისა და BBC ბაღდადის ბიუროების ყოფილმა უფროსმა.

ომის გაშუქების კურსი მიმოიხილავს ომის გაშუქების ეთიკურ მხარეს და ასწავლის, როგორ შეუძლიათ რეპორტიორებს, გააუმჯობესონ გაშუქების ხარისხი და მინიმუმამდე დაიყვანონ სხვებისა და საკუთარი თავების დაშავების რისკი. 

რისკის შეფასების კურსი ასწავლის, როგორ უნდა შეაფასო რისკები მაშინ, როცა შენი ახალი ამბების განყოფილების თანამშრომლები მტრულ გარემოში მუშაობენ და სამხედრო კონფლიქტებსა თუ ომებს აშუქებენ.

მართვის კომპლექტის კურსი განკუთვნილია ახალი ამბების განყოფილების ლიდერებისთვის, რომლებიც აღმოსავლეთ პარტნიორობის ქვეყნებში მუშაობენ. კურსის მიზანი დამოუკიდებელი მედიაორგანიზაციების ახალი ამბების განყოფილებების რედაქტორების გამოწვრთნაა. კერძოდ, ის მათ ასწავლის ახალი ამბების მართვის საფუძვლებსა და შეძენილი ცოდნის პრაქტიკაში გამოყენების გზებს. კურსი შეიმუშავეს ზოი პორტერმა, ახალი ამბების დამოუკიდებელმა კონსულტანტმა და ნატალია მუმლაძემ, „პალიტრა მედიის“ ახალი ამბების განყოფილების დირექტორმა. 

ასევე ხელმისაწვდომია კურსი სარედაქციო სახელმძღვანელო პრინციპებზე, რომელიც შეიმუშავა მირანდა ჰარსტმა, ჟურნალისტიკის ლექტორმა ედინბურგის ნეიპირის უნივერსიტეტიდან. კურსი დეტალურად ხსნის, რატომაა მნიშვნელოვანი სარედაქციო სახელმძღვანელო პრინციპების დაცვა რედაქტორებისთვის, რომლებიც ახალი ამბების განყოფილებებს უძღვებიან.

კურსები განთავსებულია EU NEIGHBOURS east პროგრამის ვებსაიტის სპეციალურ, მედიის გვერდზე, სადაც ასევე თავმოყრილია ინფორმაცია მედიაპროფესიონალებისთვის ხელმისაწვდომ სხვა შესაძლებლობებზე, მათ შორის ტრენინგებზე, დაფინანსებებსა და გრანტებზე. აქვე შეგიძლიათ გაეცნოთ უახლეს ცნობებსა და ისტორიებს, ევროკავშირის მიერ დაფინანსებულ მედიის მხარდასაჭერ პროექტებს, მედიის კვლევებსა და ანგარიშებს.