ბრიუსელში ევროკავშირისა და აღმოსავლეთ პარტნიორობის საგარეო საქმეთა მინისტრების შეხვედრა გაიმართა 

11 დეკემბერს ბრიუსელში ევროკავშირის წევრი ქვეყნების საგარეო საქმეთა მინისტრები აღმოსავლეთ პარტნიორობის ხუთი ქვეყნის — აზერბაიჯანის, მოლდოვის რესპუბლიკის, საქართველოს, სომხეთისა და უკრაინის საგარეო საქმეთა მინისტრებს შეხვდნენ. 

მინისტერიალს საგარეო საქმეთა და უსაფრთხოების პოლიტიკის საკითხებში  ევროკავშირის უმაღლესი წარმომადგენელი, ჯოზეფ ბორელი უძღვებოდა. შეხვედრას ასევე ესწრებოდა ევროკომისარი სამეზობლო პოლიტიკისა და გაფართოებაზე მოლაპარაკებების საკითხებში, ოლივერ ვარჰეი.

მინისტერიალის მონაწილეებმა აღმოსავლეთ პარტნიორობის ფარგლებში მიღწეული შედეგები და სამომავლო რეკომენდაციები განიხილეს. 

მინისტრებმა ასევე ისაუბრეს იმაზე, თუ რა უნდა იყოს ერთობლივი საქმიანობის ძირითადი პრიორიტეტები 2024 წელს, როგორ უნდა დაჩქარდეს  აღმოსავლეთ პარტნიორობისთვის განსაზღვრული ეკონომიკური და საინვესტიციო გეგმების განხორციელება და როგორ უნდა გაუმჯობესდეს თანამშრომლობა  ცენტრალური აზიისა და დასავლეთ ბალკანეთის მსგავს რეგიონებთან და „შავი ზღვის სინერგიის“ მსგავს სხვა რეგიონულ ინიციატივებთან. 

შეხვედრაზე ყურადღება მიექცა ისეთ სფეროებს, როგორიცაა ტრანსპორტი, ენერგეტიკა, მწვანე და ციფრული გარდაქმნა, ადამიანის უფლებები, სამოქალაქო საზოგადოება, კანონის უზენაესობა და უსაფრთხოების საკითხები.

მინისტრებმა აღნიშნეს, რომ მხარს დაუჭერენ 2024 წლისთვის დათქმული შედეგების მიღწევას რეგიონული როუმინგის, საგზაო უსაფრთხოებისა თუ ტრანსპორტის მიმართულებებით.

„ევროკავშირი, წევრი სახელმწიფოები და პარტნიორები მეტი ძალისხმევით გააგრძელებენ აღმოსავლეთ პარტნიორობის ‘აღდგენის, გამძლეობის და რეფორმების’ განახლებული დღის წესრიგის შესრულებას და იმ გამოწვევების დაძლევას, რომელიც უკრაინის წინააღმდეგ რუსეთის ომს მოაქვს მთელი რეგიონისთვის“, აღნიშნულია ევროპის კავშირის საბჭოს პრესრელიზში. 

მინისტრებს სიტყვით აღმოსავლეთ პარტნიორობის სამოქალაქო საზოგადოების ფორუმმაც მიმართა.

დამატებითი ინფორმაცია

პრესრელიზი