აღმოსავლეთ პარტნიორობის სამოქალაქო საზოგადოების ფორუმი საქართველოსთვის კანდიდატის სტატუსის მინიჭებას უჭერს მხარს

აღმოსავლეთ პარტნიორობის სამოქალაქო საზოგადოების ფორუმის (EaP CSF) ხელმძღვანელი კომიტეტი, ევროკომისიის 2023 წლის გაფართოების პაკეტზე დაყრდნობით, ევროპულ საბჭოს თხოვნით მიმართავს. კერძოდ, ის საბჭოს მოუწოდებს, თავის მომდევნო, 14-15 დეკემბრის შეხვედრაზე მიიღოს  მოლდოვასა და უკრაინასთან  გაწევრიანების მოლაპარაკებების დაწყებისა და  საქართველოსთვის კანდიდატის სტატუსის მინიჭების გადაწყვეტილება. 

7 დეკემბერს გამოქვეყნებულ განცხადებაში EaP CSF აღნიშნავს, რომ გაფართოების პაკეტი უკრაინას, მოლდოვასა და საქართველოს ევროკავშირში გაწევრიანებისკენ გზას უკვალავს. „ახლანდელი ტემპი უნდა შენარჩუნდეს და გადაიდგას ნაბიჯები აღმოსავლეთ პარტნიორობის რეგიონში მომდევნო წარმატებული რეფორმების გატარებისთვის ოპტიმალური პირობების შესაქმნელად“, — წერია განცხადებაში, — „უკრაინის, მოლდოვისა და საქართველოს მოქალაქეები იმედით უყურებენ ევროპული საბჭოს მომავალ გადაწყვეტილებას, დაამტკიცოს და დააჩქაროს მათი ქვეყნების ევროკავშირში გაწევრიანების პროცესი“.

ფორუმი ასევე მოუწოდებს ევროკავშირსა და მის წევრ სახელმწიფოებს, მოამარაგოს სამივე ქვეყანა მძლავრი პოლიტიკური და ფინანსური მხარდაჭერით, რომელიც „სანდო და მნიშვნელოვანი რეფორმების გასატარებლად და დასასრულებლად“ არის საჭირო. განცხადებისვე თანახმად, ქვეყნები ევროკავშირთან ეკონომიკური ინტეგრაციითა და სამართლებრივი ჰარმონიზაციით მნიშვნელოვან სარგებელს მიიღებენ.

EaP CSF აღმოსავლეთ პარტნიორობის რეგიონსა და ევროკავშირში მოქმედი არასამთავრობო ორგანიზაციების უდიდესი ქოლგა ორგანიზაციაა. ის აღმოსავლეთ პარტნიორობის ექვს ქვეყანაში (აზერბაიჯანში, ბელარუსში, მოლდოვაში, საქართველოში, სომხეთსა და უკრაინაში) ევროპული ინტეგრაციის, რეფორმების მხარდაჭერისა და დემოკრატიული ტრანსფორმაციის ხელშესაწყობად 1,000-ზე მეტ ორგანიზაციასთან თანამშრომლობს. 

დამატებითი ინფორმაცია 

პრესრელიზი