“Fövqəladə hallara hazır olun” adlı e-təlim platforması istifadəyə verilib

Avropa İttifaqı tərəfindən birgə maliyyələşdirilən “Qara dəniz hövzəsi regionunun kiçik icmalarında təbii və texnogen fəlakətlərə qarşı fövqəladə hallara reaksiya imkanlarının təkmilləşdirilməsi” (IMPACT+) layihəsi çərçivəsində “Fövqəladə hallara hazır olun” elektron təlim platforması fəaliyyətə başlayıb.

Platformada fövqəladə hallarda hazırlıq və cavab tədbirləri imkanlarını gücləndirmək üçün nəzərdə tutulmuş iki interaktiv onlayn kurs təqdim olunur. Bu kurslar tədris materialları və qiymətləndirmə testləri ilə müşayiət olunur.

“Onlayn ilkin yardım kursu” fövqəladə hallar zamanı insanların həyatını xilas etmək üçün zəruri olan bacarıqları aşılayır. Bura ürək-ağciyər reanimasiyası (CPR), yaraya qulluq və ümumi tibbi halların idarə olunması kimi mövzular daxildir. İştirakçılar anlaşıqlı modullar və videotəlimatlar vasitəsilə fövqəladə hallar zamanı səmərəli və düzgün şəkildə hərəkət etmək üçün lazım olan inam və praktiki biliklər əldə edəcəklər.

“Fəlakətlərə hazırlıq üzrə onlayn kurs” potensial fəlakətlərə hazırlığa fokuslanır və fövqəladə hallar zamanı görülməli olan tədbirləri müəyyən edir. İştirakçılar təbii və texnogen fəlakətlər zamanı insan həyatını və mülkiyyəti qorumaq üçün risklərin qiymətləndirilməsini, resursların təşkilini və effektiv strategiyaların tətbiqini öyrənirlər.

Kursun videoçarxlarını YouTube kanalında altyazılarla izləmək mümkündür. Əlavə tədris materialları isə platforma daxilində təqdim olunur. Hər kursun sonunda iştirakçılar onlayn qiymətləndirmə vasitəsilə öz biliklərini yoxlaya bilərlər.

Platforma layihə müddəti bitdikdən sonra da ödənişsiz və əlçatan olaraq qalacaq. Ondan bütün tərəfdaş ölkələrin yerli dövlət qurumları, məktəbləri, universitetləri, QHT-ləri və mülki müdafiə strukturları yararlana bilər. Təlim modulları və qiymətləndirmə testləri, həmçinin yerli Qızıl Aypara bölmələri tərəfindən həyata keçirilən müntəzəm təhsil və icma hazırlığı fəaliyyətlərinə inteqrasiya olunacaq.

“Interreg VI-B NEXT Qara dəniz hövzəsi” proqramının bir hissəsi olan IMPACT+ layihəsi istər təbii fəlakətlər, istərsə də texnogen böhranlar zamanı Qara dəniz hövzəsi regionundakı kiçik icmaların fövqəladə hallara qarşı dözümlülüyünü artırmağa yönəlib. Layihə transsərhəd əməkdaşlığı təşviq etmək və innovativ həllər tətbiq etməklə risklərin azaldılmasına, iqlim dəyişikliyinə uyğunlaşmaya və kənd icmalarının fövqəladə hallara reaksiya potensialının yaxşılaşdırılmasına töhfə verir.

Daha çox öyrənin

Mətbuat üçün açıqlama

Fövqəladə hallara hazır olun