ევროკავშირის მიერ თანადაფინანსებული ელექტრონული სწავლების პლატფორმა „მოემზადეთ საგანგებო სიტუაციებისთვის“

პროექტმა „შავი ზღვის აუზის რეგიონის მცირე თემებში ბუნებრივი და ტექნოგენური კატასტროფებით გამოწვეულ საგანგებო სიტუაციებზე რეაგირების შესაძლებლობების გაუმჯობესება“ (IMPACT+), რომელიც თანადაფინანსებულია ევროკავშირის მიერ, ოფიციალურად აამოქმედა ელექტრონული სწავლების პლატფორმა მოემზადეთ საგანგებო სიტუაციებისთვის.

პლატფორმა გთავაზობთ ორ ინტერაქტიულ ონლაინ კურსს, რომელთაგან თითოეულს ახლავს სასწავლო მასალები და ცოდნის შეფასების ტესტები, შექმნილი საგანგებო სიტუაციებში მზადყოფნის და რეაგირების შესაძლებლობების გასაუმჯობესებლად.

პირველი დახმარების ონლაინ კურსი უზრუნველყოფს სიცოცხლის გადასარჩენად აუცილებელ უნარებს საგანგებო სიტუაციებისთვის და მოიცავს ისეთ თემებს, როგორიცაა გულ-ფილტვის რეანიმაცია (CPR), ჭრილობების მოვლა და გავრცელებული სამედიცინო გადაუდებელი შემთხვევების მართვა. მარტივად ასათვისებელი მოდულების და ვიდეო გაკვეთილების საშუალებით მონაწილეები იძენენ თავდაჯერებულობას და პრაქტიკულ ცოდნას, რაც აუცილებელია ეფექტური რეაგირებისთვის საგანგებო სიტუაციებში.

სტიქიური უბედურებისთვის მომზადების ონლაინ კურსი ყურადღებას ამახვილებს მზადყოფნაზე მოსალოდნელი კატასტროფების მიმართ და განსაზღვრავს შესასრულებელ ქმედებებს გადაუდებელი მდგომარეობების დადგომის დროს. მსმენელები სწავლობენ, თუ როგორ შეაფასონ რისკები, მოახდინონ რესურსების ორგანიზება და განახორციელონ ეფექტიანი სტრატეგიები სიცოცხლის და საკუთრების დასაცავად ბუნებრივი და ადამიანის მიერ გამოწვეული კატასტროფების დროს.

კურსის ვიდეორგოლები ხელმისაწვდომია YouTube-ზე არჩევითი სუბტიტრებით, ხოლო დამატებითი სასწავლო მასალები მოცემულია პლატფორმაზე. თითოეული კურსის დასრულების შემდეგ, მონაწილეებს შეუძლიათ საკუთარი ცოდნის შემოწმება ონლაინ შეფასების საშუალებით.

პლატფორმა თავისუფლად იქნება ხელმისაწვდომი პროექტის დასრულების შემდეგაც. ის ხელმისაწვდომია ადგილობრივი საჯარო ხელისუფლებისთვის, ასევე სკოლების, უნივერსიტეტების, არასამთავრობო ორგანიზაციების და სამოქალაქო თავდაცვის სტრუქტურებისთვის ყველა პარტნიორ ქვეყანაში. სასწავლო მოდულები და შეფასებები ასევე ინტეგრირებული იქნება წითელი ჯვრის ადგილობრივი ფილიალების მიერ განხორციელებულ რეგულარულ საგანმანათლებლო და საზოგადოების მზადყოფნის აქტივობებში.

პროექტი IMPACT+, რომელიც პროგრამის Interreg VI-B NEXT Black Sea Basin Programme ნაწილია, მიზნად ისახავს შავი ზღვის აუზის რეგიონში მცირე თემების მდგრადობის გაზრდას საგანგებო სიტუაციების მიმართ, რომლებიც გამოწვეულია სტიქიური უბედურებებით ან ადამიანის მიერ შექმნილი კრიზისებით. ტრანსსასაზღვრო თანამშრომლობის ხელშეწყობით და ინოვაციური გადაწყვეტების დანერგვით პროექტი ხელს შეუწყობს რისკების შემცირებას, კლიმატის ცვლილებასთან ადაპტაციას და სასოფლო თემების საგანგებო სიტუაციებზე რეაგირების შესაძლებლობების გაუმჯობესებას 

დამატებითი ინფორმაცია

პრესრელიზი

მოემზადეთ საგანგებო სიტუაციებისთვის