SALTO: oktyabr ayında Gürcüstanda tərəfdaşlıq əlaqələrinin qurulmasına yönəlmiş tədbir keçiriləcək

“Erasmus+” Gənclər Fəaliyyətdə Proqramının İslandiya Milli Agentliyi və SALTO EECA (Şərqi Avropa və Qafqaz) resurs mərkəzi bu il oktyabrın 7-dən 11-dək Gürcüstanın paytaxtı Tbilisi şəhərində tərəfdaşlıq əlaqələrinin qurulmasına həsr olunmuş tədbir təşkil edir.

“İlk addımdan qlobal müstəviyə: yerli gənclər işindən transmilli əlaqələrə doğru” adlı tədbir İslandiya ilə yanaşı, Şərqi Avropa və Qafqaz (EECA) regionundan, o cümlədən Azərbaycan, Ermənistan, Gürcüstan, Moldova və Ukraynadan olan gənclər təşkilatlarını, gənclərlə iş üzrə mütəxəssisləri və yerli fəalları bir araya gətirəcək.

Tədbirin əsas məqsədi yerli gənclər işinin reallıqlarına əsaslanan transmilli əməkdaşlığı gücləndirməkdir. Burada xüsusi diqqət gənclərlə işin praktiki və gündəlik müstəvidə ayrılmaz tərkib hissəsi kimi inklüzivliyin təmin olunmasına yönəldiləcək. İştirakçılar mövcud təcrübələri bölüşmək, bir-birlərinin iş mühiti ilə yaxından tanış olmaq və gələcəkdə “Erasmus+” çərçivəsində gənclər sahəsi üzrə birgə əməkdaşlıq layihələrinin reallaşdırılmasına zəmin yaradacaq qarşılıqlı etimada əsaslanan tərəfdaşlıq əlaqələri qurmaq imkanı əldə edəcəklər.

Layihə “Erasmus+” Gənclər Fəaliyyətdə Proqramının İslandiya Milli Agentliyi və SALTO EECA resurs mərkəzi tərəfindən maliyyələşdirilir. İştirak pulsuzdur.

Müraciət üçün son tarix iyunun 28-dir.

Daha çox öyrənin

Mətbuat üçün açıqlama