Zirvələrin ardınca: SALTO Avstriyanın Tirol regionunda gənclərlə iş üzrə təcrübəsini bölüşür

Avstriyanın Təhsil və Beynəlmiləlləşdirmə Agentliyi, SALTO Şərqi Avropa və Qafqaz üzrə Resurs Mərkəzi və Avropa Həmrəylik Korpusu ilə birgə regionlarda gənclərlə iş sahəsində fəaliyyət göstərən gənclərlə iş üzrə mütəxəssisləri, layihə rəhbərlərini və bələdiyyə əməkdaşlarını 2026-cı il sentyabrın 28-dən oktyabrın 2-dək Avstriyanın Tirol regionuna təşkil olunacaq təlimə dəvət edir.

Tədbirdə Azərbaycan, Belarus, Ermənistan, Gürcüstan, Moldova və Ukrayna vətəndaşları iştirak edə bilərlər.

Təlim səfəri proqram və tərəfdaş ölkələrin regionlarından olan 25-dək gənclərlə iş üzrə mütəxəssisi bir araya gətirəcək. İştirakçılar təcrübə mübadiləsi aparmaq, ümumi çətinlikləri müzakirə etmək və region gəncləri ilə işin praktiki nümunələrini öyrənmək imkanı qazanacaqlar. Onlar həmçinin Avstriyanın Tirol regionunda həyata keçirilən genişmiqyaslı gənclər təşəbbüsləri ilə yaxından tanış olacaqlar.

Səfər çərçivəsində region və ucqar bölgələrdə yaşayan gənclərin qarşılaşdıqları coğrafi təcridolunma, sosial və təhsil imkanlarına məhdud çıxış, eləcə də regionlardan şəhərə miqrasiyanın fəsadları kimi spesifik problemlər araşdırılacaq. İştirakçılar Tirol regionunda gənclərlə iş sahəsində bu çətinliklərin necə aradan qaldırıldığını, habelə gənclərin cəmiyyətə inteqrasiyasına, fəal iştirakçılığına və region icmalarının inkişafına verilən töhfələri müzakirə edəcəklər.

Avstriya agentliyi iştirakçıların yerləşmə və qidalanma xərclərini tam qarşılayacaq. İştirak haqqı və yol xərcləri ilə bağlı müvafiq Milli Agentliyə və ya SALTO Resurs Mərkəzinə müraciət edin.

Müraciət üçün son tarix iyunun 7-dir.

Daha çox öyrənin

Mətbuat üçün açıqlama