Azərbaycanda peşə təhsilinə dəstək məqsədilə könüllülərin cəlb olunmasına başlanıb

Avropa İttifaqı və BMT-nin İnkişaf Proqramı (BMTİP) tərəfindən Azərbaycanda peşə təlimində innovasiyaların təşviqi işinə 80 könüllü cəlb olunacaq.

“Peşə könüllüsü” təşəbbüsü “Gələcək üçün peşə təhsili və təlimi” layihəsi çərçivəsində həyata keçirilir və ölkədə gənclərin peşə təhsilinə cəlb edilməsi fəaliyyətlərinə dəstək xarakteri daşıyır.

Peşə Təhsili üzrə Dövlət Agentliyinin tabeliyində olan bütün peşə təhsili müəssisələrində təhsil alan və son 5 ildə məzun olan şəxslər peşə könüllüsü olmaq üçün bu təşəbbüsə müraciət edə bilərlər.

Maraqlanan şəxslər 13 noyabr 18:00-dək onlayn forma vasitəsilə müraciət etməlidirlər. Müraciətçilər 25 noyabr tarixinə qədər müsahibəyə dəvət ediləcəklər. Seçilmiş namizədlər 1 dekabr tarixinədək məlumatlandırılacaqlar.

Seçilmiş könüllülər sosial təşəbbüslərdə və layihələrdə iştirak edə, təcrübə qazana və təşkilat və layihənin idarə edilməsi və planlaşdırılması kimi iş bacarıqlarını inkişaf etdirə biləcəklər.

Təşəbbüs çərçivəsində könüllülərin inkişafına yönəlik müvafiq təlim və tədbirlərin keçirilməsi, eləcə də kiçik miqyaslı sosial fəaliyyətlərin təşkili nəzərdə tutulur. 

Daha çox öyrən

Könüllülər üçün müsabiqə