Azərbaycanda prezident seçkiləri: Aİ seçkilərin səmərəli idarə edildiyini, lakin tənqidlərin nəzərə alınmadığını və siyasi alternativlərin olmadığını deyir

Avropa İttifaqı ATƏT/DTİHB-nin müşahidə missiyasının 7 fevral tarixində Azərbaycanda keçirilmiş erkən prezident seçkiləri ilə bağlı ilkin nəticələri izlədiyini bildirib.

Bu seçkilər Azərbaycan Respublikasının bütün ərazisində keçirilən ilk seçkilər idi. Prezident İlham Əliyev beşinci müddətə yenidən prezident seçilib.

ATƏT/DTİHB-nin müşahidə missiyasına əsasən, seçkilər məhdudlaşdırıcı siyasi mühitdə və toplaşma, ifadə və media azadlığı daxil olmaqla, təməl hüquq və azadlıqları kölgədə qoyan qanunlar çərçivəsində baş tutub.

“Seçkilərə hazırlıq işləri səmərəli şəkildə idarə edilsə də, seçki prosesi tənqidi fikirlərin susdurulması və siyasi alternativlərin olmaması ilə xarakterizə olunub”, – Avropa Xarici Fəaliyyət Xidmətinin bəyanatında deyilir. “Seçkilər sakit və ümumilikdə yaxşı təşkil edilmişdi, lakin müşahidəçilər məcburi prosedurlara geniş şəkildə məhəl qoyulmaması, şəffaflığın olmaması və çoxsaylı ciddi pozuntuların olması barədə məlumat veriblər”.

Avropa İttifaqı Azərbaycan hökumətinin bu və əvvəlki seçkilərlə bağlı ATƏT/DTİHB-nin tövsiyələrinə riayət edəcəyi ilə bağlı gözləntilərini bir daha xatırladıb.

“Aİ Azərbaycan xalqı naminə səmərəli dövlət idarəçiliyi, insan hüquqları və qanunun aliliyi sahələri daxil olmaqla, Azərbaycanla dialoq və əməkdaşlığa sadiq olaraq qalır”, – bəyanatda deyilir.

Daha çox öyrən

Mətbuat üçün açıqlama