Avropa Həmrəylik Korpusunun könüllülük fəaliyyətlərində iştirak edən təşkilatlar üçün Türkiyədə təlim keçiriləcək

Avropa Həmrəylik Korpusu (ESC) və SALTO Resurs Mərkəzi Şərq Tərəfdaşlığı ölkələrindən olan gənclərlə iş üzrə mütəxəssisləri, gənc liderləri, gənclərlə bağlı layihə rəhbərlərini, könüllü mentorları və gənclər üzrə kouçları təlim proqramında iştirak etməyə dəvət edir. Sözügedən təlim proqramı Korpusun könüllülük fəaliyyətlərində aktiv iştirak edən təşkilatlar üçün nəzərdə tutulub.

Təlim 2026-cı ilin 15–19 iyun tarixlərində Türkiyənin İstanbul şəhərində keçiriləcək.

Proqramın əsas məqsədi ESC könüllülük fəaliyyətlərində iştirak edən təşkilatların potensialını gücləndirməkdir. Təlim çərçivəsində keyfiyyət standartları, təsir imkanları, layihələrin hazırlanması, proqram qaydaları və qarşılıqlı təcrübə mübadiləsi kimi məsələlərə diqqət yetiriləcək. Türkiyədəki əsas təlim mərhələsindən əvvəl iştirakçılar üçün icbari qaydada onlayn hazırlıq mərhələsi təşkil olunacaq.

Azərbaycan, Belarus, Ermənistan, Gürcüstan, Moldova və Ukrayna gəncləri tədbirdə iştirak edə bilərlər.

Bu layihə “Erasmus+ Gənclər Fəaliyyətdə” proqramının iştirakçı Milli Agentlikləri (NAs) tərəfindən maliyyələşdirilir. İştirak haqqı ölkədən asılı olaraq dəyişir. Ölkəniz üzrə iştirak haqqının qarşılanması imkanları barədə ətraflı məlumat almaq üçün müvafiq Milli Agentliyiniz və ya SALTO Resurs Mərkəzi (SALTO) ilə əlaqə saxlamağınız xahiş olunur.

Ərizələrin təqdim olunması üçün son tarix 29 apreldir.

Daha çox öyrənin

Mətbuat üçün açıqlama