Aİ təhlükəsiz, firavan və dayanıqlı Qara dəniz regionu üzrə yeni strategiyasını açıqlayıb

Bu gün Avropa İttifaqı (Aİ) Ukrayna, Moldova, Gürcüstan, Türkiyə, Ermənistan və Azərbaycan daxil olmaqla sabit və təhlükəsiz Qara dəniz regionu üzrə yeni strategiyasını açıqlayıb.

Strategiyanın məqsədi Avropanı Cənubi Qafqaz, Mərkəzi Asiya və digər regionlarla birləşdirmək üçün nəqliyyat əlaqələrini və iqtisadi inkişafı stimullaşdırmaqdır. Bu strategiya Rusiyanın Ukraynaya qarşı təcavüzü fonunda Aİ-nin Qara dəniz regionunda etibarlı oyunçu kimi geosiyasi rolunu gücləndirəcək.

Aİ regionla daha sıx əməkdaşlıq etməyi və nəqliyyat əlaqələri üzrə regional əməkdaşlığı növbəti səviyyəyə çatdırmağı nəzərdə tutur. Qara dəniz regionu ilə gələcək əməkdaşlıq üç istiqamət üzərində qurulub:

• Təhlükəsizliyin, sabitliyin və dayanıqlığın gücləndirilməsi;
• Dayanıqlı inkişafın və rifahın artırılması;
• Ətraf mühitin qorunması, iqlim dəyişikliyi sahəsində hazırlığın və mülki müdafiənin təşviqi.

Avropa İttifaqı regiondakı tərəfdaşları ilə birgə, regionun iqtisadi inkişaf potensialını üzə çıxarmaqla yanaşı, münaqişə və təhlükəsizliklə bağlı aktual problemləri aradan qaldırmaq məqsədilə hər bir istiqamət üzrə üç əsas təşəbbüs həyata keçirəcək:

• Qara dəniz təhlükəsizliyi təşəbbüsü və Qara dənizdə təhlükəsizlik mərkəzinin yaradılması layihəsi dənizdə təhlükəsizliyin və müdafiənin gücləndirilməsinə, son dərəcə vacib dəniz infrastrukturunun və dəniz mühitinin mühafizəsinə xidmət edəcək. Bu təşəbbüs həmçinin minatəmizləmə sahəsində regional əməkdaşlığın genişləndirilməsinə və ətraf mühitin qorunması baxımından risklərin azaldılmasına töhfə verəcək.
• Trans-Avropa Nəqliyyat Şəbəkələrinin (TEN-T) genişləndirilməsi ilə uyğunlaşdırılmış Nəqliyyat əlaqələrinin gücləndirilməsi proqramı Avropanı Cənubi Qafqaz vasitəsilə Mərkəzi Asiya ilə birləşdirən, iqtisadi inkişafı və rəqabət qabiliyyətini stimullaşdıran mühüm dəhliz kimi Qara dəniz regionunun potensialından istifadə etmək üçün nəqliyyat, enerji və rəqəmsal şəbəkələri inkişaf etdirəcək.
• Sahil zonalarında yaşayan icmaların və mavi iqtisadiyyat sektorunun hazırlıq səviyyəsinin artırılması müharibənin ətraf mühitə vurduğu zərərin aradan qaldırılması, iqlim dəyişikliyi ilə bağlı risklərlə bağlı operativ tədbirlərin görülməsi və dayanıqlı inkişaf imkanlarının reallaşdırılması istiqamətində Qara dəniz ölkələrinin imkanlarını artıracaq.

Bu strategiya Aİ-nin bütün müvafiq alət və siyasətlərinə əsaslanaraq “Global Gateway” strategiyası və “Team Europe” təşəbbüsünə (Aİ institutları, üzv dövlətlər və Avropa maliyyə institutları arasında əməkdaşlıq çərçivəsində) uyğun olaraq investisiyaların səfərbər edilməsini təmin edəcək.

Avropa Komissiyasının prezidenti Ursula von der Leyen strategiyanı şərh edərkən bildirib:
“Xüsusilə Rusiyanın Ukraynaya qarşı təcavüzü fonunda Qara dəniz regionunda sülh və təhlükəsizliyin möhkəmləndirilməsi baxımından Avropa İttifaqının fəal rolu həlledici əhəmiyyət daşıyır. Biz qonşularımızla sıx əməkdaşlıq edərək regionda sabitliyin və təhlükəsizliyin təşviqinə çalışacağıq. Birlikdə hər kəs üçün daha güclü və firavan gələcək qura bilərik”.

Avropa Komissiyası Aİ-nin bu strateji yanaşması çərçivəsində əməkdaşlığın dərinləşdirilməsi üçün tərəfdaş ölkələrlə birgə Aİ ölkələrinin nazirlərinin xüsusi görüşünün keçirilməsini təklif etmişdir.

Daha çox öyrən

Mətbuat üçün açıqlama

Avropa İttifaqının Qara dəniz regionu üzrə strateji yanaşması ilə bağlı suallar və cavablar

Məlumat bülleteni: Aİ -nin Qara dəniz üzrə strateji yanaşması