„უცხოელი აგენტების კანონი“: საქართველოს სამინისტროებს სამოქალაქო სექტორზე 10-ჯერ მეტი დაფინანსება აქვს ევროკავშირისგან მიღებული

ევროკავშირის წარმომადგენლობამ საქართველოში „‘უცხოური გავლენის გამჭვირვალობის შესახებ’ კანონის კონტექსტში“ საჭირო განმარტებისთვის გამოაქვეყნა მონაცემები, სადაც ქვეყნისადმი ევროკავშირის მხარდაჭერაა ნაჩვენები.  

„საქართველოს მიმართ ევროკავშირის მხარდაჭერასთან დაკავშირებული არასწორი ინტერპრეტაციის საპასუხოდ“ გამოქვეყნებული მონაცემებით ცხადდება, რომ 2019-2024 წლებში ევროკავშირის მხარდაჭერის ათი  ყველაზე მსხვილი ბენეფიციარი სამინისტროები და სახელმწიფო სააგენტოები იყო. 

„სამინისტროებმა მიიღეს 10-ჯერ მეტი მხარდაჭერა, ვიდრე სამოქალაქო სექტორმა“, ვკითხულობთ ევროკავშირის წარმომადგენლობის Facebook-ის გვერდზე გამოქვეყნებულ პოსტში. 

ევროკავშირის წარმომადგენლობის თანახმად, 2019 წლიდან დღემდე რეგიონული განვითარებისა და ინფრასტრუქტურის სამინისტრომ და ადგილობრივმა თვითმმართველობებმა ევროკავშირისგან 111.55 მილიონი ევრო მიიღეს. ევროკავშირმა 101.4 მილიონი ევრო გამოუყო საქართველოს ფინანსთა სამინისტროს, 62.75 მილიონი ევრო კი — თავდაცვის სამინისტროს. გარემოს დაცვისა და სოფლის მეურნეობის სამინისტრომ და მისმა სააგენტოებმა 57 მილიონი ევრო მიიღეს. ამასთან, საქართველოს პარლამენტმა ევროკავშირისგან მიიღო 4.8 მილიონი ევრო და ამ მაჩვენებლით ის ბენეფიციართა სიაში მეთერთმეტე ადგილს იკავებს. 

საქართველოს საჯარო სექტორმა ევროკავშირისგან საერთო ჯამში 517.82 მილიონი ევრო მიიღო, რაც COVID-19-ის პანდემიის პერიოდში გაცემულ 75 მილიონი ევროს ოდენობის სესხსაც მოიცავს. შესადარებლად, ევროკავშირმა საქართველოს სამოქალაქო საზოგადოებისთვის 46.1 მილიონი ევრო გამოყო, ხოლო ქვეყნის კერძო სექტორისთვის — 6.1 მილიონი ევრო.

დამატებითი ინფორმაცია

პრესრელიზი