თბილისში ნულოვანი ნარჩენის დღე აღინიშნა

30 მარტს თბილისში, მზიურის პარკში ადამიანები ნულოვანი ნარჩენის საერთაშორისო დღის აღსანიშნავად და უფრო სუფთა, მწვანე და ჯანსაღი გარემოს მხარდასაჭერად შეიკრიბნენ.

კავკასიის გარემოსდაცვითი არასამთავრობო ორგანიზაციების ქსელმა (CENN) ღონისძიება საქართველოს გარემოს დაცვისა და სოფლის მეურნეობის სამინისტროსთან თანამშრომლობით და ევროკავშირის, ნორვეგიისა და გაეროს განვითარების პროგრამის (UNDP) ხელშეწყობით ჩაატარა. 

ერთდღიანი ღონისძიების სტუმრები, მონაწილეები და ორგანიზატორები ჩაერთნენ ინტერაქციულ და საგანმანათლებლო აქტივობებში, რომელთა მიზანიც ნარჩენების მდგრად მართვაზე ცნობიერების ამაღლება იყო. 

კერძოდ, გაიმართა თამაშები და ქვიზები ბავშვებისა და ზრდასრულებისთვის და მოეწყო ბიზნესის გამოფენა, რომელზეც ქართული კომპანიების მიერ დანერგილი ეკოლოგიური მიდგომები წარმოჩნდა.

მზიურის პარკში ასევე გაიმართა მეორადი ტანსაცმლისა და წიგნების გაცვლის აქცია და მოეწყო ნარჩენების გადამუშავებისა და დახარისხების კუთხეები.

„ნულოვანი ნარჩენების კონცეფცია მოიაზრებს ნებისმიერი ტიპის ნარჩენის გადამუშავებას და ახალ რესურსად  ქცევას. საქართველოში უკვე დაინერგა ნარჩენების მართვის თანამედროვე მოდელი — მწარმოებლის გაფართოებული ვალდებულება — ნარჩენების შემდეგ ოთხ ნაკადზე: საბურავები, ბატარეები და აკუმულატორები, ელექტრო და ელექტრონული მოწყობილობები და ზეთები. ამ პროცესებში საზოგადოების ცნობიერების გაზრდას და მათ ჩართულობას დიდი როლი აქვს“, — აღნიშნა საქართველოს გარემოს დაცვისა და სოფლის მეურნეობის სამინისტროს წარმომადგენელმა, ირმა გურგულიანმა.

დამატებითი ინფორმაცია

პრესრელიზი