საქართველოსა და ევროკავშირს შორის უსაფრთხოების საკითხებზე სტრატეგიული დიალოგი გაიმართა

2021 წლის 25 ნოემბერს ბრიუსელში საქართველოსა და ევროკავშირს შორის უსაფრთხოების საკითხებზე მაღალი დონის სტრატეგიული დიალოგის მეოთხე შეხვედრა გაიმართა. შეხვედრაზე ორივე მხარემ დაადასტურა თავისი ინტერესი და მტკიცე სურვილი საგარეო პოლიტიკისა და უსაფრთხოების საკითხებში თანამშრომლობის გაღრმავების თაობაზე, როგორც ეს ასოცირების შეთანხმებით არის გათვალისწინებული.

შეხვედრის მონაწილეებმა განიხილეს საქართველოს აფხაზეთისა და ცხინვალის/სამხრეთ ოსეთის რეგიონებში არსებული კონფლიქტის დინამიკა — მათ შორის, უკანასკნელ პერიოდში ადგილზე შექმნილი მდგომარეობა, რომელიც დაკავშირებულია რუსეთის ქმედებებთან. ამასთან, ხაზი გაესვა ევროკავშირის შუამავლობით მიღწეული 2008 წლის ცეცხლის შეწყვეტის შესახებ შეთანხმების შესრულების მნიშვნელობას. 

ორივე მხარემ კიდევ ერთხელ ხაზგასმით აღნიშნა ევროკავშირის სადამკვირვებლო მისიის მნიშვნელოვანი როლი საქართველოში მშვიდობისა და უსაფრთხოების კუთხით და ყურადღება გაამახვილა სადამკვირვებლო მისიის მიერ მანდატის სრულად განხორციელების აუცილებლობაზე. ევროკავშირმა კიდევ ერთხელ დაადასტურა თავისი მხარდაჭერა საქართველოს სუვერენიტეტისა და ტერიტორიული მთლიანობის მიმართ საერთაშორისოდ აღიარებული საზღვრების ფარგლებში.

ევროკავშირმა მადლიერება გამოხატა ერთიანი თავდაცვისა და უსაფრთხოების პოლიტიკის ფარგლებში განხორციელებულ ისეთ ოპერაციებში საქართველოს ღირებული მონაწილეობის თაობაზე, როგორიცაა ცენტრალური აფრიკის რესპუბლიკასა და მალიში ევროკავშირის კრიზისების მართვის მისიები. ამასთან, ხაზი გაესვა საქართველოს მიერ შესრულებულ სატრანზიტო ჰაბის როლსაც ავღანეთიდან ევაკუაციის პროცესში.

დამატებითი ინფორმაცია

პრესრელიზი