საქართველოს ევროკავშირში გაწევრიანების მხარდასაჭერად ევროკავშირი ქვეყანაში ინტელექტუალური საკუთრების უფლებებს გააძლიერებს

25 მარტს კიშინიოვში ევროკავშირის მიერ დაფინანსებული ახალი თანამშრომლობის პროექტი — ევროკავშირი ინტელექტუალური საკუთრებისთვის (EU4IP) — დაიწყო. 

EU4IP საქართველოს, მოლდოვასა და უკრაინას ინტელექტუალური საკუთრების უფლებების გაძლიერებაში დაეხმარება. პროექტის ძირითადი ამოცანებია: საკანონმდებლო ჩარჩოს დახვეწა და ევროკავშირის ინტელექტუალური საკუთრების ნორმატიულ-სამართლებრივ ბაზასთან შესაბამისობაში მოყვანა, ინტელექტუალური საკუთრების ინსტიტუტებისა და ქსელების მხარდაჭერა, აღსრულების მექანიზმებზე თანამშრომლობა და ცნობიერების ამაღლება — კერძო სექტორსა და მცირე და საშუალო ბიზნესზე ფოკუსირებით. პროექტი, რომლის ბიუჯეტი ევროკავშირის მიერ უზრუნველყოფილი 4 მილიონი ევროა, ორი წელი გაგრძელდება.  

პროექტს ევროკავშირის ინტელექტუალური საკუთრების უწყება (EUIPO) საქართველოს ინტელექტუალური საკუთრების ეროვნულ ცენტრთან (საქპატენტი), მოლდოვის ინტელექტუალური საკუთრების სახელმწიფო სააგენტოსთან (AGEPI) და უკრაინის ინტელექტუალური საკუთრებისა და ინოვაციების ეროვნულ ოფისთან (UANIPIO) პარტნიორობით განახორციელებს.

„ჩვენ ძალ-ღონეს არ დავიშურებთ, რომ თითოეულ ქვეყანას კონკრეტული საჭიროებების შესაბამისი დახმარება აღმოვუჩინოთ. ევროკავშირის მიერ დაფინანსებული პროექტი, EU4IP, რომელსაც დღეს ვიწყებთ, ხელს შეუწყობს ჩვენი პარტნიორი ქვეყნების ინტელექტუალური საკუთრების საკითხებზე არსებული კანონმდებლობის — წესების, სამართლებრივი დაცვისა და აღსრულების მექანიზმების — ევროკავშირის ნორმატიულ-სამართლებრივ ბაზასთან შესაბამისობაში მოყვანას“, — განაცხადა EUIPO-ს აღმასრულებელმა დირექტორმა, ჟოაო ნეგრაომ.

26 მარტს EUIPO-მ თბილისის სახელმწიფო უნივერსიტეტთან, საქართველოს ტექნიკურ უნივერსიტეტთან და მოლდოვის ეკონომიკური კვლევების აკადემიასთან ურთიერთთანამშრომლობის მემორანდუმს (MoU) მოაწერა ხელი. ეს პირველი შემთხვევაა, როცა EUIPO ევროკავშირისა და ევროპის საპატენტო კონვენციის (EPC) საზღვრებს მიღმა არსებულ უნივერსიტეტებთან ითანამშრომლებს. 

დამატებითი ინფორმაცია

პრესრელიზი