ევროპის ციფრული მედიის ობსერვატორია მედიაწიგნიერების გზამკვლევს აქვეყნებს

ევროპის ციფრული მედიის ობსერვატორიამ (EDMO) მედიაწიგნიერების ეფექტიანი ინიციატივებისთვის გზამკვლევი გამოაქვეყნა. 

გზამკვლევი EDMO-ს მედიაწიგნიერების სტანდარტებისა და საუკეთესო პრაქტიკის მიმართულებით არსებულმა სამუშაო ჯგუფმა EDMO-ს 14 ეროვნული და საერთაშორისო ჰაბისა და 50-ზე მეტ ქვეყანაში მომუშავე 100-ზე მეტი ექსპერტის დახმარებით შექმნა. 

გზამკვლევის მიზანია, ევროპის მასშტაბით შეუწყოს ხელი მედიაწიგნიერების ინიციატივების გაუმჯობესებას. ეს EDMO-ს ზოგადი მისიისთვის არსებითი მნიშვნელობისაა, რადგან მედიაწიგნიერება საზოგადოებას ონლაინსივრცეში გავრცელებული ყალბი ამბებისა და დეზინფორმაციის ამოცნობაში ეხმარება. 

გზამკვლევი განკუთვნილია ყველასთვის, ვინც მედიაწიგნიერების ინიციატივების განვითარებაში მონაწილეობს — იქნებიან ისინი  განმანათლებლები, სამოქალაქო საზოგადოების, მედიისა თუ ტექინდუსტრიის სფეროს წარმომადგენლები. 

„მედიაწიგნიერების მსგავს კომპლექსურ და მრავალფეროვან სფეროში ვერაფრით იმუშავებს ერთი უნივერსალური მიდგომა“, — ვკითხულობთ ევროკომისიის პრესრელიზში, — „მედიაწიგნიერების ინიციატივები — როგორიცაა ტრენინგები, ხელმისაწვდომი საგანმანათლებლო რესურსები, ონლაინთამაშები თუ კამპანიები — მნიშვნელოვნად განსხვავდებიან მასშტაბით, ზომით, ხანგრძლივობით თუ მიზნით. შედეგად, ამ გზამკვლევში თავმოყრილი ყველა რჩევა ვერ იქნება ყველა პროექტისთვის რელევანტური. გზამკვლევის მკითხველებმა თავად უნდა განსაჯონ, რომელი რჩევები წაადგება მათ ინიციატივებს“. 

გზამკვლევს რეკომენდაცია უკვე გაუწია 60-ზე მეტმა ორგანიზაციამ, მათ შორის საგანმანათლებლო დაწესებულებებმა, მარეგულირებელმა სააგენტოებმა, ფაქტების შემოწმებასა და მედიაწიგნიერებაზე მომუშავე ერთეულებმა და სხვა სამოქალაქო საზოგადოების ორგანიზაციებმა. 

დამატებითი ინფორმაცია

პრესრელიზი 

გზამკვლევის ჩამოსატვირთი ბმული