ევროკავშირმა ჟურნალისტიკის კონკურსის 2020 წლის გამარჯვებულები დაასახელა 

23 მარტს ევროკავშირმა კონკურსის, „ევროკავშირის პრიზი ჟურნალისტიკაში”, გამარჯვებულთა ვინაობა გამოაცხადა. კონკურსი საქართველოში მომუშავე იმ პროფესიონალებს აჯილდოებს, რომელთა საქმიანობა ჟურნალისტური ეთიკის, პროფესიონალიზმის და ხარისხის უმაღლეს სტანდარტებს აკმაყოფილებს. საკონკურსო დაჯილდოების მეცხრე ცერემონია დისტანციურად ჩატარდა. 

პრიზი „საუკეთესო სტატიისთვის ბეჭდურ ან ელექტრონულ მედიაში“ გადაეცა გიორგი გაგუას; „საუკეთესო სიუჟეტისთვის სამაუწყებლო ან ელექტრონულ მედიაში“ — მერი შიხაშვილს; „საუკეთესო საგამოძიებო სტატიის ან სიუჟეტისთვის ბეჭდურ, ელექტრონულ ან სამაუწყებლო მედიაში“ — თამუნა ჩქარეულს; „საუკეთესო ბლოგის/საავტორო სტატიის/სვეტისთვის ბეჭდურ ან ელექტრონულ მედიაში“ — ბასტი მგალობლიშვილს; „საუკეთესო ორიგინალური და ინოვაციური ნაშრომისთვის ბეჭდურ, ელექტრონულ ან სამაუწყებლო მედიაში“ — ეკა ქევანიშვილს; „საუკეთესო დოკუმენტური ფოტოსთვის, რომელიც ევროკავშირის ფასეულობებს ასახავს“ — სოფო აფციაურს; ხოლო ევროკავშირის სადამკვირვებლო მისიის (EUMM) სპეციალური პრიზი  „კონფლიქტების თემატიკასთან დაკავშირებული საუკეთესო ჟურნალისტური ნაშრომისთვის“  ქეთევან მაღრაძეს ერგო.

„2020 წელი ძალიან რთული იყო — მათ შორის, ჟურნალისტებისთვისაც, რომლებსაც პოლიტიკური კრიზისის წინა ხაზზე უწევდათ ყოფნა. ისინი, ამასთან, COVID19-ის პანდემიის შესახებაც გამუდმებით გვაწვდიდნენ საჭირო ინფორმაციას“, — განაცხადა ევროკავშირის წარმომადგენლობის ხელმძღვანელმა საქართველოში, ელჩმა კარლ ჰარცელმა, — „დღეს მსოფლიოს ყველა წერტილში მომუშავე ჟურნალისტები ისეთი გამოწვევების წინაშე დგანან, როგორიცაა პოლიტიკური და ეკონომიკური წნეხი და დეზინფორმაციასთან ბრძოლა. ამ გამოწვევების ფონზე ევროკავშირი ჟურნალისტური ეთიკის ერთგულ მხარდამჭერად და დამცველად რჩება“. 

„დამოუკიდებელი, კონფლიქტების მიმართ მგრძნობიარე ჟურნალისტიკა უმნიშვნელოვანესია ნდობისა და გრძელვადიანი მშვიდობის აღდგენისათვის“, — აღნიშნა ევროკავშირის სადამკვირვებლო მისიის ხელმძღვანელმა, მარეკ შჩიგელმა.

პირველ ექვს კატეგორიაში გამარჯვებულები ფულადი ჯილდოს სახით დაახლოებით 6 ათას ლარს მიიღებენ. ევროკავშირის სადამკვირვებლო მისიის სპეციალური პრიზის მფლობელი კი ლონდონში, „ომისა და მშვიდობის გაშუქების ინსტიტუტში“ გაივლის ერთთვიან სტაჟირებას.

დამატებითი ინფორმაცია

პრესრელიზი