ევროკავშირმა სამხრეთ კავკასიასა და საქართველოში კრიზისის საკითხებში ახალი სპეციალური წარმომადგენელი დაამტკიცა 

26 ივლისს ევროკავშირის საბჭომ სამხრეთ კავკასიასა და საქართველოში კრიზისის საკითხებში ევროკავშირის ახალი სპეციალური წარმომადგენელი დანიშნა.

მაგდალენა გრონომ ტოივო კლაარი ჩაანაცვლა, რომლის თანამდებობაზე ყოფნის ექვს წელზე მეტი ხნის ვადა 31 აგვისტოს ამოიწურა. მაგდალენა გრონო თავისი მოვალეობის შესრულებას საწყისი 12 თვის ვადით  2024 წლის 1 სექტემბერს შეუდგება.

„როგორც ევროკავშირის ახალი სპეციალური წარმომადგენელი, მაგდალენა გრონო გააგრძელებს თავისი წინამორბედების საქმიანობას და ხელს შეუწყობს რეგიონში ევროკავშირის საგარეო პოლიტიკის მიზნების განხორციელებას. ის ხელს შეუწყობს კონფლიქტების მშვიდობიან მოგვარებას, კერძოდ გაეროსთან და ეუთოსთან მჭიდრო კოორდინაციით იმუშავებს საქართველოში არსებულ კრიზისზე და სომხეთსა და აზერბაიჯანს შორის  ნორმალიზაციის პროცესებზე“, –  ნათქვამია ევროკავშირის საბჭოს პრესრელიზში.

პრესრელიზის თანახმად, მაგდალენა გრონო ითანამშრომლებს მთავარ აქტორებთან რეგიონში, კავშირებს დაამყარებს მთავრობებთან, პარლამენტებთან, სხვა მნიშვნელოვან პოლიტიკურ აქტორებთან და სამოქალაქო საზოგადოებასთან და ხელს შეუწყობს საერთო რეგიონული ინტერესების გარშემო თანამშრომლობას.

ჩეხეთის მოქალაქე მაგდალენა გრონო ამჟამად ევროპის საბჭოს პრეზიდენტის, შარლ მიშელის მთავარი დიპლომატიური მრჩევლის თანამდებობას იკავებს. ბოლო 25 წლის განმავლობაში ის მუშაობდა საგარეო პოლიტიკისა და კონფლიქტების მოგვარების საკითხებზე  – მათ შორის ევროკავშირის მაღალი დონის დიპლომატიურ თანამდებობებზე  და ანალიტიკურ ცენტრებში. მისი საქმიანობა მჭიდროდ იყო დაკავშირებული ყოფილ საბჭოთა სივრცესთან და კონკრეტულად სამხრეთ კავკასიასთან. 

პრეზიდენტ მიშელის კაბინეტში მუშაობის დაწყებამდე მაგდალენა გრონო ევროპული საბჭოს ყოფილი პრეზიდენტის, დონალდ ტუსკის მრჩეველი იყო საგარეო პოლიტიკის საკითხებში. მანამდე კი მას საერთაშორისო კრიზისების ჯგუფში ევროპისა და ცენტრალური აზიის რეგიონების დირექტორის თანამდებობა ეკავა.

დამატებითი ინფორმაცია

პრესრელიზი