ევროკავშირმა და გაეროს განვითარების პროგრამამ არაფორმალური განათლებისა და პროფესიული სწავლების ინიციატივის შედეგები შეაჯამეს

ევროკავშირმა და გაეროს განვითარების პროგრამამ (UNDP) ინოვაციური ინიციატივის, „უკეთესი უწყვეტი განათლების შესაძლებლობები ადგილობრივი პარტნიორობის დახმარებით“, შედეგები შეაჯამეს. ინიციატივა ახალგაზრდებისთვის საგანმანათლებლო შესაძლებლობების შექმნას ემსახურებოდა. 

პროექტი ხუთ სამიზნე რეგიონში — აჭარის ავტონომიურ რესპუბლიკაში, გურიაში, იმერეთში, კახეთსა და რაჭა-ლეჩხუმში განხორციელდა. მიღწეულ შედეგთა შორისაა ახალი საგანმანათლებლო პროგრამების შექმნა, ციფრული სწავლების დანერგვა და განათლებისა და ტრენინგის მიღმა მყოფი (NEET) ახალგაზრდების ხელშეწყობა. 

2021-2023 წლებში განხორციელებული 1.3 მილიონი აშშ დოლარის ღირებულების პროექტი ევროკავშირმა და UNDP-მა დააფინანსეს. პროექტის მუშაობაში ასევე ჩართულები იყვნენ პარტნიორები — ახალგაზრდული ცენტრი „მზიანი სახლი“ და საქართველოს უნარების სააგენტო.

ამ პერიოდის განმავლობაში შვიდმა კოლეჯმა მიიღო ინსტიტუციური მხარდაჭერა, რაც მოიცავდა სამეწარმეო კოლეჯის მოდელის დანერგვას, ტექნიკურ ხელშეწყობას და მასწავლებლებისა და ადმინისტრაციული პერსონალის გადამზადებას. 

ინიციატივის ფარგლებშივე ათმა საჯარო სკოლამ მიიღო მხარდაჭერა პროფესიული სასწავლო პროგრამების დასანერგად, რის შედეგადაც სკოლის მოსწავლეებსა და თემის წევრებს მეტად მიუწვდებათ ხელი პროფესიული ტრენინგის შესაძლებლობებზე. 

გარდა ამისა, პროფესიულ კოლეჯებში დაინერგა კლასგარეშე აქტივობები მეწარმეობის, ხელოვნების, სპორტის, ჯანსაღი ცხოვრების წესისა და სოციალური ჩართულობის მიმართულებებით. პარტნიორ კოლეჯებში კი შეზღუდული შესაძლებლობის მქონე პირებისთვის კარიერის მართვისა და პროფესიული ორიენტაციის საპილოტე პროგრამა განხორციელდა. 

დამატებითი ინფორმაცია

პრესრელიზი

„უკეთესი უწყვეტი განათლების შესაძლებლობები ადგილობრივი პარტნიორობის დახმარებით“