ევროკავშირის მინისტრები საქართველოში სერიოზულ დემოკრატიულ უკუსვლაზე საუბრობენ

16 დეკემბერს ზოგად საკითხთა საბჭოში შეკრებილმა ევროკავშირის მინისტრებმა გაფართოების პროცესის პროგრესი განიხილეს, რის შედეგადაც, თავმჯდომარეობამ 26 წევრი სახელმწიფოს მიერ პოლიტიკურად მხარდაჭერილი დასკვნები გამოაქვეყნა. 

დოკუმენტში განსაზღვრულია ევროკავშირის პოლიტიკური პრიორიტეტები, შეფასებულია სიტუაცია ევროკავშირის თითოეულ პარტნიორ ქვეყანაში და ჩამოყალიბებულია შემდგომი რეფორმების მიმართულებები.

„გაფართოების დღის წესრიგში პროგრესს მივაღწიეთ – განსაკუთრებით, უკრაინასთან, მოლდოვასთან, ალბანეთთან და მონტენეგროსთან“, – განაცხადა ევროპის საკითხებში დანიის მინისტრმა, მარი ბიერმა, რომელიც ევროკავშირის საბჭოში დანიის თავმჯდომარეობას წარმოადგენს, – „სამწუხაროდ, ერთი წევრი სახელმწიფოს მიერ ბლოკირების გამო, საბჭოს დასკვნების მიღება ვერ მოხერხდა, თუმცა, 26-მა წევრმა სახელმწიფომ მკაფიო და ძლიერი სიგნალი გაგზავნა იმის შესახებ, თუ რა მიმართულებით უნდა იარონ ევროკავშირში გაწევრიანების მსურველმა ქვეყნებმა“. 

საბჭომ ხელახლა გაუსვა ხაზი გაფართოების გეოსტრატეგიულ მნიშვნელობას და ყველა პარტნიორს მოუწოდა, „გამოიყენონ შესაძლებლობა, გამოიყენონ წინსვლის არსებული ტემპი და გადადგან ყველა საჭირო ნაბიჯი ევროკავშირისკენ გზაზე პროგრესის ასაჩქარებლად“. 

საქართველოსთან დაკავშირებით, საბჭომ კვლავ დაადასტურა, რომ ევროკავშირი მხარს უჭერს „ქართველი ხალხის უდიდესი უმრავლესობის ევროპულ მისწრაფებებს“. 

„საქართველოს ხელისუფლების მიერ გადადგმული ნაბიჯები ვერ აკმაყოფილებს კანდიდატი ქვეყნის მიმართ ევროკავშირის მოლოდინებს. საბჭო აღნიშნავს დემოკრატიის, ადამიანის უფლებებისა და კანონის უზენაესობის სფეროებში არსებულ სერიოზულ საერთო უკუსვლას, მათ შორის ისეთი რეპრესიული კანონმდებლობის მიღებით, რომელიც ძირს უთხრის ფუნდამენტურ უფლებებსა და თავისუფლებებს, ასევე, სასამართლოს პოლიტიკურ ინსტრუმენტალიზაციას, ოპოზიციის ლიდერების დევნას, მომიტინგეებისა და ჟურნალისტების თვითნებურ დაკავებებს და სამოქალაქო სივრცის შეზღუდვას“, — ნათქვამია დოკუმენტში.

საბჭომ ასევე დაგმო საქართველოს ხელისუფლების მიერ დეზინფორმაციისა და ევროკავშირის საწინააღმდეგო ნარატივების გავრცელება და ამ პროცესის შეჩერება მოითხოვა.

რაც შეეხება უკრაინასა და მოლდოვას, საბჭომ აღნიშნა, რომ ქვეყნებმა წარმატებით დაასრულეს სკრინინგის პროცესი და რომ ევროკავშირი ორივე კანდიდატთან მოლაპარაკებების ექვსი ბლოკის გასახსნელად ემზადება, „რაც დაუყოვნებლივ დაიწყება საფუძვლების ბლოკის გახსნით და მას მომდევნო ბლოკებიც მიჰყვება, როგორც ეს მეთოდოლოგიითა და  მოლაპარაკებების ჩარჩოთი არის განსაზღვრული“. 

დამატებითი ინფორმაცია

პრესრელიზი

თავმჯდომარეობის დასკვნები