ევროკავშირის ჰუმანიტარული დახმარების წლიური ბიუჯეტი 1.8 მილიარდ ევროს შეადგენს

იმის გათვალისწინებით, რომ 2024 წელს ჰუმანიტარული დახმარება 300 მილიონამდე ადამიანს დასჭირდება, ევროკავშირმა წლიური ჰუმანიტარული დახმარებისთვის 1.8 მილიარდი ევრო გამოყო.

ბიუჯეტიდან დაახლოებით 115 მილიონი ევრო სამხრეთ-აღმოსავლეთ ევროპისა და ევროპის სამეზობლოსთვისაა განკუთვნილი. ამ თანხის უდიდესი ნაწილი მოხმარდება უკრაინაში რუსეთის აგრესიული ომის შედეგების შერბილებას, ასევე  დასავლეთ ბალკანეთსა და კავკასიაში არსებული საჭიროებების მოგვარებაზე მომუშავე  პროექტების დაფინანსებას და სირიის კრიზისის გავლენების შემსუბუქებას თურქეთში. 

თითქმის 470 მილიონი ევრო მოხმარდება შუა აღმოსავლეთს და ჩრდილოეთ აფრიკას — ღაზას უკიდურესი ჰუმანიტარული საჭიროებებისთვის, სირიას მიმდინარე რეგიონული კრიზისისთვის, ასევე ლიბანს, იემენს და მის მეზობელ ქვეყნებს. 

დაახლოებით 315 მილიონი ევრო საგანგებო მდგომარეობებსა და გაუთვალისწინებელ ჰუმანიტარულ კრიზისებზე რეაგირებისთვისაა გათვალისწინებული.

„2024 წლის დაწყებასთან ერთად, ჰუმანიტარულ საჭიროებებსა და ხელმისაწვდომ რესურსებს შორის ნაპრალი კვლავ აგრძელებს გაფართოებას“, — განაცხადა ევროკომისარმა კრიზისების მართვის საკითხებში, ჯანეზ ლენარჩიჩმა, — „ამავე დროს, მოთხოვნა დაფინანსებაზე ძალიან მაღალია, ვინაიდან კონფლიქტების რაოდენობა მატულობს, ხოლო კლიმატური კრიზისი უარესდება… ამ შემაშფოთებელი ტენდენციის გათვალისწინებით, ევროკომისია გააგრძელებს ჰუმანიტარული საქმიანობის დაფინანსებას დაუცველთა მხარდასაჭერად — განურჩევლად იმისა, თუ ვინ და მსოფლიოს რომელ წერტილში არიან ისინი“. 

ევროკომისია ჰუმანიტარულ დახმარებას 1992 წლიდან ახორციელებს. მისი დახმარება ყოველწლიურად 110-ზე მეტ ქვეყანას და მილიონობით ადამიანს სწვდება. 

დამატებითი ინფორმაცია

პრესრელიზი