ევროკავშირი საქართველოში და სხვა დიპლომატიური წარმომადგენლობები გმობენ მზია ამაღლობელის სასამართლო განაჩენს და ჟურნალისტის  დაუყოვნებლივ განთავისუფლებისკენ მოუწოდებენ

6 აგვისტოს სქართველოში 24 ქვეყნის დიპლომატიურმა წარმომადგენლობამ, საქართველოში ევროკავშირის წარმომადგენლობის და ევროკავშირის წევრი ქვეყნების საელჩოების ჩათვლით, დაგმო ჟურნალისტ მზია ამაღლობელის მიმართ გამოტანილი “არაპროპორციული და პოლიტიზებული” განაჩენი, რომლითაც მას 2 წლით პატიმრობა მიესაჯა.  მათ სოლიდარობა გამოხატეს მზიას მიმართ და მისი დაუყოვნებლივ განთავისუფლებისკენ მოუწოდეს.

იმ დიპლომატიური წარმომადგენლობების სია, რომელთაც ევროკავშირთან ერთად ამ განცხადებას ხელი მოაწერეს, შემდეგ ქვეყნებს მოიცავს: ავსტრია, ბელგია, კანადა, ჩეხეთი, დანია, ესტონეთი, ფინეთი, საფრანგეთი, გერმანია, ისლანდია, ირლანდია, იტალია, ლატვია, ლიეტუვა, ლუქსემბურგი, ნიდერლანდები, ნორვეგია, პოლონეთი, რუმინეთი, ესპანეთი, შვედეთი, უკრაინა და გაერთიანებული სამეფო.

“მზია ამაღლობელის საქმე დამატებით დაამძიმა მისმა გაჭიანურებულმა წინასწარმა პატიმრობამ, როდესაც მისი ჯანმრთელობის მდგომარეობა და განსაკუთრებით მისი მხედველობა მნიშვნელოვნად გაუარესდა,” აღნიშნულია განცხადებაში. “მზია ამაღლობელის საქმე და “ბათუმელებსა”  და “ნეტგაზეთზე” განხორციელებული ზეწოლა საქართველოში ჟურნალისტების მზარდი დაშინების, დაუსჯელი ძალადობისა და სამართლებრივი დევნის მაგალითია, მედიის თავისუფლებისა და გამოხატვის თავისუფლების დაცვის კუთხით საქართველოს მიერ აღებული საერთაშორისო ვალდებულებების აშკარა დარღვევის გზით”.

გარდა ამისა, დიპლომატებმა გაიმეორეს მედიის თავისუფლების კოალიციის მიერ 2024 წლის 20 დეკემბერს გავრცელებული განცხადება, რომელიც გმობს ყოველგვარ ძალადობას და დაშინებას ჟურნალისტების და მედიის წარმომადგენლების მიმართ.

დამატებითი ინფორმაცია

პრესრელიზი