ევროკავშირი გმობს „დაშინებას, მუქარასა და ფიზიკურ შეურაცხყოფას“ პროტესტის მონაწილეების მიმართ საქართველოში

ევროკავშირმა მოუწოდა საქართველოს ხელისუფლებას, უზრუნველყოს საქართველოს მოსახლეობის პროტესტის უფლება. ამის შესახებ საგარეო საქმეთა საკითხებში ევროკავშირის პრესსპიკერმა, პიტერ სტანომ 13 მაისს პრესისთვის გამართულ ბრიფინგზე განაცხადა.

მისი თქმით, ევროკავშირს არ გამოჰპარვია „სასტიკი ქმედებები“ ღამით და ის „მკაცრად გმობს დაშინების აქტებს, მუქარასა და ფიზიკურ თავდასხმებს მომიტინგეების, სამოქალაქო აქტივისტების, პოლიტიკოსების, ჟურნალისტებისა და მედიის წარმომადგენლების წინააღმდეგ“.

„ჩვენ ხელისუფლებას სათანადო გამოძიებისკენ მოვუწოდებთ… და ჩვენ მოველით, რომ პასუხისმგებელი პირები მართლმსაჯულების წინაშე წარდგებიან“, — აღნიშნა მან. 

პიტერ სტანომ დასძინა, რომ ევროკავშირი და წევრი სახელმწიფოები „ყურადღებით“ აკვირდებიან სიტუაციას. საქართველოს წინააღმდეგ შესაძლო სანქციების შესახებ შეკითხვაზე პასუხის გაცემისას კი მან განაცხადა, რომ საქმე „ჯერ აქამდე არ მისულა“ და რომ ეს ევროკავშირის წევრი ქვეყნების ერთიანი გადაწყვეტილება უნდა იყოს.

„ბოლოს და ბოლოს, საქართველო კანდიდატი ქვეყანაა და გავიმეორებ, რომ ჩვენ ვიმედოვნებთ, მოველით და მოვუწოდებთ ხელისუფლებას, დაუბრუნდნენ ევროპულ გზას და შეასრულონ ყველა ის ვალდებულება, რომელიც ნებაყოფლობით აიღეს კანდიდატის სტატუსის მისაღებად განაცხადის შეტანისას“, — განაცხადა სტანომ.

დამატებითი ინფორმაცია

პრესბრიფინგი