ევროკავშირი: ახალი კანონები უარყოფითად აისახება საქართველოს ევროკავშირისკენ მიმავალ გზაზე და რეპრესიებს გაამკაცრებს

ახალი კანონმდებლობა — მათ შორის, „უცხოეთის აგენტების რეგისტრაციის აქტი“ და „მაუწყებლობის შესახებ“ კანონი, რომელიც საქართველოს პარლამენტმა 2 აპრილს სათანადო საჯარო კონსულტაციების გარეშე მიიღო — „ქართულ ოცნებას“ „განსხვავებული აზრის დასათრგუნად და რეპრესიების პოლიტიკის გასამკაცრებლად დამატებით ინსტრუმენტებს აძლევს“, ვკითხულობთ  ევროკავშირის უმაღლესი თანამდებობის პირების განცხადებაში.

ევროკავშირის უმაღლესმა წარმომადგენელმა, კაია კალასმა და გაფართოების საკითხებში ევროკომისარმა მარტა კოსმა საერთო განცხადებაში აღნიშნეს, რომ „ეს კანონები სტიგმატიზების რისკის ქვეშ აყენებს სამოქალაქო აქტივისტების მუშაობას, საფრთხეს უქმნის სამოქალაქო საზოგადოებისა და დამოუკიდებელი მედიის არსებობის გაგრძელებას, უკან ხევს ადამიანის უფლებების დაცვას, ზღუდავს ფუნდამენტურ თავისუფლებებს და ძირს უთხრის დემოკრატიულ პრინციპებზე დაფუძნებულ გადაწყვეტილებების მიღებას“.

„ეს ნაბიჯები კიდევ უფრო მეტად არყევს დემოკრატიის საფუძვლებს საქართველოში“, — წერია განცხადებაში, — „ასეთი ქმედებები არსებითად შეუთავსებელია ევროკავშირის ღირებულებებთან, როგორიცაა დემოკრატია, კანონის უზენაესობა და მედიის პლურალიზმი, და შორს არის იმისგან, რასაც კანდიდატი ქვეყნისგან მოველით. ეს ნაბიჯები უარყოფითად იმოქმედებს საქართველოს ევროკავშირისკენ მიმავალ გზაზე. ევროკავშირის ამ ღირებულებების გაზიარება სავალდებულოა“.

მათ ასევე დაურთეს, რომ ქართველი ხალხის დიდ უმრავლესობას ქვეყნის ევროკავშირში გაწევრიანება სურს და „ქართულ ოცნებას“ მოუწოდეს, ევროკავშირისკენ მიმავალ გზაზე სვლას „ჭეშმარიტად და შეუქცევადად“ დაუბრუნდნენ. 

დამატებითი ინფორმაცია

პრესრელიზი