EU4Dialogue საქართველოში 40-ზე მეტ სამოქალაქო საზოგადოების ინიციატივას უჭერს მხარს

ევროკავშირისა და გაეროს განვითარების პროგრამის (UNDP) ერთობლივი პროექტის, EU4Dialogue, განცხადებით, გასული ოთხი წლის განმავლობაში მის ფარგლებში 40-ზე მეტი სამოქალაქო და სათემო ინიციატივა განხორციელდა. ამ ძალისხმევამ მნიშვნელოვნად შეუწყო ხელი ადგილობრივი მოსახლეობის ეკონომიკური მდგომარეობის გაუმჯობესებასა და სოციალურ ჩართულობას.

27 ივნისს UNDP-ის წარმომადგენლები სამეგრელოს რეგიონს ეწვივნენ, სადაც სამოქალაქო საზოგადოების იმ რამდენიმე ინიციატივის შედეგებს გაეცნენ, რომლებიც EU4Dialogue-ის ფარგლებში უწყობს ხელს ადგილობრივი თემის განვითარებასა და გააქტიურებას.

სტუმრები ზუგდიდში სოფელ რუხიდან გადმოტანილი ახლად რესტავრირებული კედლის მოზაიკის ნიმუშების ოფიციალურ გახსნას დაესწრნენ. რესტავრირებული მოზაიკური პანოები, „წითელკაბიანი მანდილოსანი“, „ზაფხული სამეგრელოში“ და „მუსიკოსები“ მე-20 საუკუნის მონუმენტური ხელოვნების სამაგალითო ნიმუშებს წარმოადგენს. ეს მემკვიდრეობა საზიაროა კონფლიქტის ორივე მხარეს მცხოვრები თემებისთვის. EU4Dialogue პროექტით მხარდაჭერილი პანოების რესტავრაცია ზუგდიდის მხატვრული რეწვის ცენტრის, „მოზაიკა სტუდიოს“ ქართველი და ფრანგი ექსპერტებისა და „ფონდი რიბირაბოს“ ჩართულობით გახდა შესაძლებელი. რესტავრაციაში კონფლიქტის შედეგად დაზარალებული რეგიონებში მცხოვრები ახალგაზრდებიც აქტიურად მონაწილეობდნენ. 

UNDP-ის წარმომადგენელთა ვიზიტი გაგრძელდა საქველმოქმედო ჰუმანიტარული ცენტრი „აფხაზეთის“ საკონსულტაციო ცენტრში, რომელიც კონფლიქტის ორივე მხარეს მცხოვრებ ადამიანებს სთავაზობს ფსიქოლოგიურ დახმარებას და კონსულტაციებს სხვადასხვა სოციალურ სერვისზე. დაარსებიდან პირველი ხუთი თვის განმავლობაში, 2024 წლის იანვრიდან მაისის ჩათვლით, ცენტრმა 360-ზე მეტი სატელეფონო 120-ზე მეტი პირისპირ კონსულტაცია გასწია.

„EU4Dialogue: კონფლიქტის ტრანსფორმაციის მხარდაჭერა სამხრეთ კავკასიასა და მოლდოვის რესპუბლიკაში“  ევროკავშირისა და UNDP-ის ერთობლივი ინიციატივაა, რომელიც EU4Dialogue პროგრამის ფარგლებში ხორციელდება. პროექტი თანამშრომლობს ადგილობრივ სამოქალაქო საზოგადოების ორგანიზაციებთან და სამოქალაქო ჯგუფებთან, რათა გააუმჯობესოს ადამიანების სოციალურ-ეკონომიკური პირობები, შექმნას საარსებო წყაროები, ხელი შეუწყოს წინსვლას გენდერული თანასწორობისკენ, წაახალისოს ახალგაზრდების ჩართულობა და მხარი დაუჭიროს კონფლიქტის მშვიდობიან გარდაქმნას.