ბორელი: საქართველოში უცხოური გავლენის შესახებ კანონის მიღებაზე გადაწყვეტილებას ევროკავშირი საგარეო საქმეთა მომდევნო საბჭოზე მიიღებს

27 მაისს, ევროკავშირის საგარეო საქმეთა საბჭოზე, ევროკავშირის საგარეო საქმეთა მინისტრებმა საქართველოში უცხოური  გავლენის შესახებ კანონის ამოქმედების შემთხვევაში „ევროკავშირის მხრიდან ყველაზე შესაფერისი პასუხის“ განხილვა დაიწყეს. ამის შესახებ  ჟურნალისტებს ევროკავშირის უმაღლესმა წარმომადგენელმა ჯოზეფ ბორელმა საბჭოს დასრულების შემდეგ განუცხადა. მან დასძინა, რომ გადაწყვეტილებას მიიღებენ მომავალ საგარეო საქმეთა საბჭოზე, რომელიც 24 ივნისს არის დაგეგმილი. 

ბორელმა საქართველოს ხელისუფლებას მოუწოდა, გააუქმოს კანონი ვენეციის კომისიის 21 მაისს გამოქვეყნებული დასკვნის შესაბამისად. 

„ვისურვებდი, რომ წევრი [სახელმწიფოები] მზად იყვნენ გადაწყვეტილებების მისაღებად ყოველ ჯერზე, როდესაც ისეთი რამ ხდება, რაც არ შეესაბამება ჩვენს ფასეულობებს, არ შეესაბამება საერთაშორისო ნორმებსა და ევროპულ გზას — არა მარტო საქართველოში, არამედ მსოფლიოს ნებისმიერ წერტილში”, — აღნიშნა ბორელმა. 

საქართველოში მომავალ არჩევნებთან დაკავშირებით ბორელმა განაცხადა, რომ „ქართველ ხალხს მოუწევს, ხმა მისცეს თავისი ქვეყნის განვითარების ტრაექტორიას“.

„მთავრობის ქმედებებმა შეიძლება, საბოლოოდ იქონიოს გავლენა იმ უპირატესობებზე, რომლითაც ისინი ევროკავშირში ინტეგრაციის შედეგად სარგებლობენ. მაგრამ გადაწყვეტილება ჯერ მიღებული არ არის”, — დასძინა ევროკავშირის უმაღლესმა წარმომადგენელმა.

დამატებითი ინფორმაცია

პრესრელიზი