2008 წლის აგვისტოს რუსეთ-საქართველოს ომი: ევროკავშირი საქართველოს ტერიტორიული მთლიანობის მხარდაჭერას ადასტურებს 

ევროკავშირი კიდევ ერთხელ უსვამს ხაზს, რომ ის გმობს რუსეთის მიერ საქართველოს რეგიონების, აფხაზეთისა და ე.წ. სამხრეთ ოსეთის აღიარებას და ამ ტერიტორიებზე მისი სამხედრო ძალების ყოფნას. „ეს არის როგორც საერთაშორისო სამართლის, ასევე 2008 წლის 12 აგვისტოს ხელშეკრულებით რუსეთის მიერ ნაკისრი ვალდებულებების დარღვევა“, — ნათქვამია  პრესრელიზში, რომელიც საქართველოში ევროკავშირის წარმომადგენლობამ 2008 წლის აგვისტოს რუსეთ-საქართველოს ომის მე-14 წლისთავზე გამოაქვეყნა.

„კონფლიქტით დაზარალებული მოსახლეობის ადამიანის უფლებები ისევ ირღვევა — მათ შორის ე.წ. ‘ბორდერიზაციის’, გადაკვეთის პუნქტების დახურვისა და უკანონო დაკავებების საშუალებით. ამ ადამიანთა გადაადგილების თავისუფლება აღარ უნდა იზღუდებოდეს“, — ვკითხულობთ პრესრელიზში, — „ჩვენ კვლავ ვითხოვთ ანგარიშვალდებულებას, მათ შორის წარსულში ჩადენილი ადამიანის უფლებების ყველა დარღვევის სანდო გამოძიების გზით, რათა დამნაშავეებმა პასუხი აგონ, მსხვერპლებისთვის სამართლიანობა აღდგეს და რუსეთის ფედერაციამ სათანადოდ შეასრულოს ადამიანის უფლებათა ევროპული სასამართლოს 2021 წლის 21 იანვრის ისტორიული მნიშვნელობის მქონე გადაწყვეტილების მოთხოვნები“.

ევროკავშირი აცხადებს, რომ კვლავ სრულად უჭერს მხარს კონფლიქტის მოგვარებას — მათ შორის ჟენევის საერთაშორისო დისკუსიებში თანათავმჯდომარის რანგში ევროკავშირის ჩართულობის, სამხრეთ კავკასიასა და საქართველოში კრიზისის საკითხებში ევროკავშირის სპეციალური წარმომადგენლის საქმიანობის და ადგილზე უწყვეტად მყოფი ევროკავშირის სადამკვირვებლო მისიის მუშაობის საშუალებით.  გარდა ამისა, ევროკავშირი ადასტურებს საქართველოს დამოუკიდებლობის, სუვერენიტეტისა და ტერიტორიული მთლიანობის მტკიცე მხარდაჭერას ქვეყნის საერთაშორისოდ აღიარებულ საზღვრებში.

დამატებითი ინფორმაცია

პრესრელიზი