European Heritage Hub-ը հայտարարում է ԵՄ հարեւանության երկրներում ժառանգության 14 նախագծերի ֆինանսավորման մասին, որոնցից մեկը՝ Հայաստանում

Եվրոպական միության կողմից համաֆինանսավորվող եւ Եվրոպայում ժառանգության շահակիրներին միմյանց կապող «European Heritage Hub» պիլոտային ծրագիրը հունիսի 26-ին հայտարարել է իր Փոքր դրամաշնորհների ծրագրի համար ԵՄ հարեւանության 11 երկրներից ժառանգության 14 նախագծեր ընտրելու մասին: Քաղաքացիական հասարակության կազմակերպությունների կողմից իրականացվելիք ընտրված նախաձեռնություններին հատկացվել է մոտ 250,000 եվրո։ Այն բաշխվել է փոքր, միջին եւ խոշոր դրամաշնորհների միջեւ:

Այս տարվա հունվարին մեկնարկած փոքր դրամաշնորհների ծրագիրն աջակցում է ԵՄ հարեւանության երկրներում (ներառյալ` Հայաստանում) քաղաքացիական հասարակության կողմից իրականացվող ժառանգության նախագծերին։ Այն նպատակ ունի բարձրացնելու նրանց՝ Եվրոպայի կանաչ, թվային եւ սոցիալական փոխակերպումներին արձագանքելու կարողությունները, ինչպես նաեւ խթանելու խաղաղությունը, կայունությունը, հաշտեցումը եւ միջմշակութային ու միջկրոնական երկխոսությունը: 2024 թվականի հունվարից մարտ ամիսներին հայտերի ընդունման ընթացքում ստացվել է մրցույթի մժչափանիշներին համապատասխանող 600 դիմում:

Ընտրված նախագծերն ընդգծում են եվրոպական ընդհանուր ժառանգության հիմնարար դերը ԵՄ ընդլայնման գործընթացում: Նախաձեռնությունները տարբեր են՝ ժառանգության խթանումից մինչեւ կրթական գործունեություն, հուշարձանների եւ ժառանգության օբյեկտների գույքագրում, քարտեզագրում կամ թվայնացում եւ պատերազմից տուժած քաղաքների վերակենդանացում:

Հայաստանից ընտրվել է «Կապույտ վահան Հայաստան»-ի (Blue Shield Armenia) ներկայացրած «Ժառանգության պահապաններ. Հայաստանի մշակութային պաշտպանության ամրապնդում» նախագիծը։ Այն կնպաստի Հայաստանում արտակարգ իրավիճակների պատրաստվածության բարձրացմանը եւ կապահովի մշակութային մասնագետների եւ կամավորների վերապատրաստում: Իջեւան, Բերդ, Գորիս եւ Կապան քաղաքներում անցկացվող սեմինարները մասնակիցներին կօժտեն մշակութային ժառանգությունը պաշտպանելու հմտություններով:

Դրամաշնորհային ծրագիրը ղեկավարվում է «Եվրոպա Նոստրա»-ի կողմից (որպես «European Heritage Hub» ծրագրի ղեկավար)` կոնսորցիումի այլ անդամների համաձայնությամբ եւ ALIPH հիմնադրամի համաֆինանսավորմամբ։

Իմացիր ավելին

Մամուլի հաղորդագրություն