Ուկրաինա

Ուկրաինան ԵՄ անդամակցության դիմում է ներկայացրել 2022 թվականի փետրվարի 28-ին։ 2022 թվականի հունիսի 17-ին Եվրոպական հանձնաժողովը հրապարակել է այդ դիմումի վերաբերյալ իր կարծիքը։ Հիմք ընդունելով Հանձնաժողովի առաջարկությունները՝ Եվրոպական խորհուրդը ճանաչել է Ուկրաինայի եվրոպական հեռանկարը եւ 2022 թվականի հունիսի 23-ին երկրին շնորհել թեկնածուի կարգավիճակ: 2023 թվականի նոյեմբերի 8-ին Հանձնաժողովն իր ընդլայնման փաթեթի շրջանակում հրապարակել է Ուկրաինայի մասին զեկույցը՝ առաջարկելով անդամակցության շուրջ բանակցություններ սկսել վերջինիս հետ:

Ուկրաինայի մասին զեկույց

Ընդլայնման մասին 2023 թվականի հաղորդագրության մեջ Եվրոպական հանձնաժողովը նշել է, որ Ուկրաինան զգալի առաջընթաց է գրանցել 2022 թվականին մատնանշված յոթ առանցքային բարեփոխումների ուղղությամբ:

«Հանձնաժողովը գտնում է, որ Ուկրաինան բավարար չափով կատարում է ժողովրդավարությունը, օրենքի գերակայությունը, մարդու իրավունքները եւ փոքրամասնությունների նկատմամբ հարգանքն ու պաշտպանությունը երաշխավորող ինստիտուտների կայունության չափանիշները», - նշել է ԵՀ-ն։

Զեկույցում արձանագրվել է, որ երկիրը սահմանադրական դատարանի դատավորների համար ստեղծել է թափանցիկ նախընտրական համակարգ եւ բարեփոխել է դատական կառավարման մարմինները: Դրանում ասվում է, որ Ուկրաինան զարգացրել է բարձր մակարդակի կոռուպցիոն հետաքննությունների եւ դատավճիռների իր փորձը եւ դրական քայլեր է ձեռնարկել օլիգարխների ազդեցությանն ուղղված ավելի լայն եւ համակարգային ջանքերի առումով: ԵՀ-ն արձանագրել է, որ երկիրը նաեւ ցույց է տվել նույնիսկ պատերազմի ժամանակ ԵՄ օրենսդրությանը համապատասխանելու հարցում առաջընթաց գրանցելու իր կարողությունը։

Կարդալ ավելին զեկույցի հիմնական եզրահանգումների մասին։

Ուկրաինայի ուղին դեպի ԵՄ

Թեկնածուի կարգավիճակը շնորհվել է այն ըմբռնմամբ, որ Ուկրաինան ձեռնարկում է որոշ առանցքային քայլեր։ Հանձնաժողովը մշտադիտարկում է այդ քայլերի ուղղությամբ առաջընթացը եւ զեկուցում դրանց մասին՝ որպես իր կանոնավոր հիմունքներով հրապարակվող ընդլայնման փաթեթի մաս:

Սեղմեք այստեղ՝ Ուկրաինային ԵՄ աջակցության եւ նրա անդամակցության ճանապարհի մասին ավելին իմանալու համար:

Մոլդովա

Մոլդովան ԵՄ անդամակցության դիմում է ներկայացրել 2022 թվականի մարտին։ 2022 թվականի հունիսի 17-ին Եվրոպական հանձնաժողովը հրապարակել է այդ դիմումի վերաբերյալ իր կարծիքը։ Հիմք ընդունելով Հանձնաժողովի առաջարկությունները՝ Եվրոպական խորհուրդը ճանաչել է Մոլդովայի եվրոպական հեռանկարը եւ 2022 թվականի հունիսի 23-ին երկրին շնորհել է թեկնածուի կարգավիճակ: 2023 թվականի նոյեմբերի 8-ին Հանձնաժողովն իր ընդլայնման փաթեթի շրջանակում հրապարակել է Մոլդովայի մասին զեկույցը՝ առաջարկելով անդամակցության շուրջ բանակցություններ սկսել վերջինիս հետ:

Մոլդովայի մասին զեկույց

Ընդլայնման մասին 2023 թվականի հաղորդագրության մեջ Եվրոպական հանձնաժողովը նշել է, որ Մոլդովան կարեւոր առաջընթաց է գրանցել 2022 թվականին իր կողմից մատնանշված ինը առանցքային քայլերի ուղղությամբ:

«Հանձնաժողովը գտնում է, որ Մոլդովան բավարար չափով կատարում է ժողովրդավարությունը, օրենքի գերակայությունը, մարդու իրավունքները եւ փոքրամասնությունների նկատմամբ հարգանքն ու պաշտպանությունը երաշխավորող ինստիտուտների կայունության չափանիշները», - նշել է ԵՀ-ն։

Զեկույցում նշվում է, որ երկիրը սկսել է արդարադատության համապարփակ բարեփոխում։ Դրանում ասվում է, որ Մոլդովան բարեփոխել է իր հակակոռուպցիոն մարմինները եւ ավելացրել կոռուպցիոն գործերով հետաքննությունների ու դատավճիռների թիվը, ընդունել եւ իրականացնում է ապաօլիգարխիզացման գործողությունների ծրագիր, ինչպես նաեւ միջոցներ է ձեռք առել կազմակերպված հանցավորության դեմ պայքարում: Զեկույցում նաեւ նշվում է, որ երկիրն ընդունել է պետական կառավարման ռազմավարություն եւ աշխատում է բարեփոխել հանրային ֆինանսների կառավարման եւ պետական գնումների ոլորտները: Հանձնաժողովը նաեւ արձանագրել է, որ Մոլդովան մեծացրել է քաղաքացիական հասարակության մասնակցությունը որոշումների կայացման գործընթացում եւ ուժեղացրել է մարդու իրավունքների պաշտպանությունը։

Կարդալ ավելին զեկույցի հիմնական եզրահանգումների մասին։

Մոլդովայի ուղին դեպի ԵՄ

2023 թվականի հունիսի 28-ին նախագահ ֆոն դեր Լեյենը ներկայացրել է Մոլդովային աջակցության փաթեթը, որը ներառում էր հինգ առաջնահերթություն՝ ուղղված Ուկրաինայի դեմ Ռուսաստանի ագրեսիայի պատերազմի ազդեցությանը եւ Մոլդովային Եվրոպական միությանն ավելի մերձեցմանը։

Սեղմեք այստեղ՝ Մոլդովային ԵՄ աջակցության եւ նրա անդամակցության ճանապարհի մասին ավելին իմանալու համար:

Վրաստան

Վրաստանը ԵՄ անդամակցության դիմում է ներկայացրել 2022 թվականի մարտին։ 2022 թվականի հունիսի 17-ին Եվրոպական հանձնաժողովը հրապարակել է այդ դիմումի վերաբերյալ իր կարծիքը։ Հիմք ընդունելով Հանձնաժողովի առաջարկությունները՝ Եվրոպական խորհուրդը ճանաչել է Վրաստանի եվրոպական հեռանկարը եւ երաշխավորել երկրին թեկնածուի կարգավիճակի շնորհում՝ որոշակի առաջնահերթ քայլերի կատարման դեպքում: 2023 թվականի նոյեմբերի 8-ին Եվրոպական հանձնաժողովն իր ընդլայնման փաթեթի շրջանակում Խորհրդին առաջարկել է Վրաստանին շնորհել թեկնածու երկրի կարգավիճակ՝ վերջինիս կողմից մի շարք քայլեր կատարելու պայմանով։

Հանձնաժողովը ողջունել է Վրաստանի ձեռնարկած բարեփոխումների ջանքերը՝ երկրի սահմանադրությանը համապատասխան, որը որպես երկրի առաջնահերթություն նախատեսում է նրա ինտեգրումը ԵՄ-ին։

Վրաստանի մասին զեկույց

Վրաստանի վերաբերյալ Եվրոպական հանձնաժողովի 2023 թվականի զեկույցում նշվում է, որ 2022 թվականի հունիսի սկզբնական եզրակացության մեջ նշված տասներկու առաջնահերթությունների մասով՝ Վրաստանն ընդունել է օրենսդրական ակտեր եւ ձեռնարկել քաղաքական միջոցառումներ գենդերային հավասարության եւ կանանց նկատմամբ բռնության դեմ պայքարի, Մարդու իրավունքների եվրոպական դատարանի վճիռները դատական քննարկումներում հաշվի առնելու, ինչպես նաեւ կազմակերպված հանցավորության դեմ պայքարի վերաբերյալ: Երկիրը նշանակել է նաեւ նոր հանրային պաշտպան։ Զեկույցում, սակայն, ընդգծվում է, որ բարեփոխումների գործընթացը խոչընդոտվել է շարունակական քաղաքական լարվածության, խորը բեւեռացման եւ ազգային շահերի հիմնական հարցերի շուրջ կոնսենսուս ստեղծելու մարտահրավերների պատճառով:

Հանձնաժողովն առաջարկել է Վրաստանին շնորհել թեկնածու երկրի կարգավիճակ՝ մի շարք ոլորտներում քայլեր ձեռնարկելու պայմանով, այդ թվում՝ ապատեղեկատվության եւ օտարերկրյա տեղեկատվական մանիպուլյացիայի դեմ պայքարը, ԵՄ ընդհանուր արտաքին եւ անվտանգության քաղաքականության հետ համապատասխանեցման բարելավումը, քաղաքական բեւեռացման խնդրի լուծումը, ազատ, արդար եւ մրցակցային ընտրական գործընթացի ապահովումը, ինչպես նաեւ ապաօլիգարխիզացման համակարգային մոտեցման ապահովումն ու դատական համակարգի ամբողջական եւ արդյունավետ բարեփոխումները:

Կարդալ ավելին զեկույցի հիմնական եզրահանգումների մասին։

Վրաստանի ուղին դեպի ԵՄ

Վրաստանը վերջին ամիսներին քայլեր է ձեռնարկել ԵՄ-ի հետ փոխգործակցությունն ամրապնդելու եւ բարեփոխումների տեմպերի ավելացման ուղղությամբ՝ ի արձագանք իր անդամակցության դիմումի վերաբերյալ Հանձնաժողովի կարծիքում նշված տասներկու առաջնահերթությունների։

հանձնաժողովը Խորհրդին առաջարկել է Վրաստանին շնորհել թեկնածու երկրի կարգավիճակ՝ մի շարք քայլեր ձեռնարկելու պայմանով։

Սեղմեք այստեղ՝ Վրաստանին ԵՄ աջակցության եւ նրա անդամակցության ճանապարհի մասին ավելին իմանալու համար:

Ինչպե՞ս է աշխատում բանակցությունների գործընթացը

Բանակցություններ

Բանակցությունների գործընթացը բաղկացած է 6 թեմատիկ կլաստերների ներքո խմբավորված 35 բանակցային գլուխներից: Յուրաքանչյուր կլաստերի շուրջ բանակցությունները բացվում են որպես ամբողջություն՝ այն բանից հետո, երբ երկիրը բավարարում է բացման պայմանները: Յուրաքանչյուր գլուխ քննարկվում է առանձին՝ կապված դրա նախնական փակման հետ։

Հիմնարար սկզբունքներ

Հիմնարար սկզբունքների շուրջ բանակցությունները սկսվում են առաջինը եւ ավարտվում վերջինը։ Հիմնարար սկզբունքների կլաստերի ներքո առաջընթացն է որոշում բանակցությունների ընդհանուր տեմպը: