2. ԲԱՎԱԿԱՆԱՉԱՓ ՔՆԻՐ

Առողջ քունը կենսական նշանակություն ունի մեր մտքի և մարմնի համար։ Մինչ մենք քնած ենք, մեր ուղեղը տպավորությունները հիշողության է վերածում, իսկ մեր մարմինը վերականգնում է ուժերը: Մեծահասակներին անհրաժեշտ է օրական 7-ից 9 ժամ քուն, իսկ դեռահասներին՝ 8-ից 10 ժամ:

Քնի պակասը կարող է ազդել մարդու հոգեկան առողջության վրա, իսկ հոգեկան առողջությունը, իր հերթին, կարող է ազդել մարդու քնի վրա, ուստի կարևոր է զուգահեռաբար երկու խնդիրներին էլ ուշադրություն դարձնել:

3. ՖԻԶԻԿԱՊԵՍ ԱԿՏԻՎ ԵՂԻՐ

Հոգ տար մարմնիդ մասին. սպորտը և ֆիզիկական վարժություններն օգտակար են մարմնի, մտքի ու բարձր ինքնագնահատականի համար: Ֆիզիկական վարժություններն արտադրում են «երջանկության» հորմոններ, որոնք նվազեցնում են սթրեսի և զայրույթի զգացումը: Դրանք մեզ օգնում են ավելի լավ զգալ մեր մարմինը և կարող են բարելավել մեր քունը:

Լավ ինքնազգացողություն. երբ մարմինն ակտիվ է, ուղեղն արտադրում է էնդորֆիններ: Դրանք բարձրացնում են մարդու տրամադրությունը և թեթևացնում սթրեսը:

Շփում. ֆիզիկական վարժությունը մեդիտացիա է շարժման մեջ: Մարմնիդ վրա կենտրոնանալիս մոռանում ես խնդիրներիդ մասին: Թիմային մարզաձևերն օգնում են ընդլայնել շփման շրջանակը։

Ինքնագնահատական. սպորտով զբաղվելով՝ մենք սահմանում ենք նպատակներ և հասնում ենք դրանց:

Արա այն, ինչը քեզ դուր է գալիս. ցանկացած ֆիզիկական վարժություն օգտակար է, եթե այն անելիս՝ քեզ լավ ես զգում, ինչպես նաև բավականաչափ երկար ես դա անում: Ֆիզիկական վարժություն անելը պետք է հաճելի լինի, հակառակ դեպքում դժվար կլինի կանոնավոր կերպով դա անելու մոտիվացիա գտնել:

Ցանկացած վարժություն անելն ավելի լավ է, քան ոչինչ չանելը. նույնիսկ 10 րոպեանոց արագ քայլքը կարող է թարմացնել միտքդ և օգնել հանգստանալ:

Բնություն. բնության գրկում գտնվելն իսկապես կարող է հանգստացնող ազդեցություն ունենալ: Միացրու զգայարաններդ և ուշադրություն դարձրու շրջապատող ամեն ինչին՝ ծառերին, թռչուններին ու կենդանիներին, քամու ու ջրի ձայնին: Խորը շունչ քաշիր և տես, թե ինչպես ես քեզ զգում:

3. ԱՇԽԱՐՀԻՆ ՆԱՅԻՐ ԱՅԼ ԱՉՔԵՐՈՎ

Տվյալ պահը գնահատելը կարող է օգնել ավելի շատ վայելել մեզ շրջապատող աշխարհը և ավելի լավ հասկանալ ինքներս մեզ:

Ուշադրություն դարձրու առօրյային. մեր առօրյա կյանքն ապրելիս՝ մենք կարող ենք նկատել կյանքի հաճելի մանրուքները՝ այն սնունդը, որն ուտում ենք, օդը, որը շնչում ենք, և այլն:

Կանոնավորություն ամեն ինչում. օգտակար կարող է լինել շրջապատող աշխարհից քո տպավորությունները վերլուծելու համար կանոնավոր ժամանակի ընտրությունը, օրինակ՝ առավոտյան աշխատավայր գնալու կամ երեկոյան զբոսանքի ժամանակահատվածը։

Օգնություն խնդրիր. խնդիրներ ունենալը նորմալ երևույթ է: Կարող ես հետևել նշված խորհուրդներին, բայց, միևնույն ժամանակ, մասնագիտական օգնության կարիք ունենալ: Եթե կարծում ես, որ չես կարող գլուխ հանել, դիմիր մասնագետի օգնությանը։

2. ՁԵՌՔ ԲԵՐ ՆՈՐ ՀՄՏՈՒԹՅՈՒՆՆԵՐ

Հետազոտությունները ցույց են տալիս, որ նոր հմտություններ յուրացնելը օգնում է բարելավել ձեր հոգեկան վիճակը, բարձրացնում է ինքնավստահությունը և զարգացնում է նպատակասլացության զգացում: Եթե ուշադիր նայես շուրջդ, բազմաթիվ հնարավորություններ կտեսնես։

Ձեռք բեր նոր հոբբի, որը քեզ համար մարտահրավեր կլինի։ Օրինակ՝ բլոգ պահիր, զբաղվիր նոր մարզաձևով կամ սովորիր նկարել:

Գրանցվեք դասընթացի. փորձիր նոր լեզու սովորել կամ ձեռք բերել գործնական հմտություն, որը կօգնի քո անձնական աճին և կարիերայի զարգացմանը:

Ստանձնիր նոր պարտականություններ աշխատավայրում կամ ուսման վայրում:

Ինքդ քո առաջ կոնկրետ խնդիրներ դիր. սարքի բեր փչացած հեծանիվը, սովորիր կերակուր պատրաստել, բանջարանոց ստեղծիր: Համացանցում կան բազմաթիվ անվճար տեսաուղեցույցներ այս ամենի մասին:

Նոր բան փորձիր. դա կարող է լինել նախաճաշի ամբողջական վերանայումից մինչև ընկերներիդ հետ արշավի պլանավորում: Հնարավոր է՝ գտնես մի նոր սիրելի վայր կամ քո մեջ բացահայտես նոր տաղանդ կամ հետաքրքրություն:

3. ՕԳՆԻՐ ՈՒՐԻՇՆԵՐԻՆ

Մարդկանց նկատմամբ եղիր բարեհամբույր. ժպիտ կամ բարեկամական խոսքեր փոխանակելը կարող է մխիթարող ազդեցություն ունենալ ու բարձրացնել մեր տրամադրությունը: Հետաքրքրվիր մարդկանց կյանքով. ընկերներիդ, բարեկամներիդ կամ գործընկերներիդ հարցրու, թե ինչպես են իրենց գործերը և ուշադիր լսիր նրանց պատասխանը:

Սկսիր փոքր բաներից. զանգ տուր տատիկիդ, հավաքիր փողոցի աղբը կամ օգնիր ինչ-որ մեկին գնումներ կատարելիս:

Կամավորություն արա. եթե ժամանակ ունես, զբաղվիր կամավորությամբ: Ուրիշներին օգնելը կօգնի շփման եզրեր գտնել այլ մարդկանց հետ, սեփական խնդիրներին նայել կողքից, ձեռք բերել բավարարվածության և արժևորված լինելու զգացում և գործակցել ուրիշների հետ մեկ թիմում։

ԻՆՉՊԵՍ ՕԳՆԵԼ ՈՒՐԻՇԻՆ

Մենք բոլորս դժվար ժամանակներ ենք ապրում և մարդիկ օգնում են մեզ հաղթահարել դրանք: Այլ հավասար իրավիճակում մենք անհանգստանում ենք մեր հարազատների՝ ընկերոջ, ընտանիքի անդամի կամ գործընկերոջ հոգեկան առողջության համար։ Կան բազմաթիվ եղանակներ աջակցելու մեկին, ով քեզ համար թանկ է։

Իմացիր ավելին հոգեկան առողջության և բարեկեցության մասին: Երբեմն դու կարող ես չիմանալ, որ դիմացինդ ունի հոգեկան առողջության խնդիր, բայց դա նույնիսկ պարտադիր էլ չէ: Ուղղակի պատասխանելիս եղիր նրբանկատ և լսիր դիմացինիդ:

Մի սպասիր. Կարող է բարդ թվալ, բայց եթե անհանգստանում ես ինչ-որ մեկի համար ու գիտես, որ նա խնդիր ունի, նախաձեռնողականություն ցուցաբերիր: Դիմացինիդ արտահայտվելու հնարավորություն տուր, բայց նրան մի ծանրաբեռնիր հարցերով։ Քեզ հետ կիսվելը դիմացինիցդ կարող է մեծ վստահություն և քաջություն պահանջել: Դու կարող ես լինել առաջինը, ում հետ նա կփորձի կիսվել իր խնդրով:

Տուր հարցեր և համբերատար սպասիր պատասխանի. դիմացինիդ պատասխանելու ժամանակ տուր և փորձիր նրան չծանրաբեռնել հարցերով: Ակտիվ պահիր շփումը, նույնիսկ եթե դա դժվար է: 

Խոսիր սեփական անձի նկատմամբ հոգատարության մասին: Մարզվելը, առողջ սննդակարգ ունենալը և լավ գիշերային քունը կարող են օգնել պաշտպանել հոգեկան առողջությունը և պահպանել ներքին հավասարակշռություն: 

Առաջարկիր օգնություն մասնագիտական աջակցություն փնտրելու հարցում և տրամադրիր տեղեկատվություն դա անելու ուղիների մասին:

Ճանաչիր սահմաններդ: Ինքդ քեզ ժամանակ տուր հանգստանալու և լսածդ «մարսելու» համար: Օգնիր դիմացինիդ ստեղծել նրան օգնելու ունակ ընկերներից, հարազատներից և հոգեկան առողջության մասնագետներից բաղկացած աջակցության ցանց։