ԵՄ-ն անհանգստացած է Լեռնային Ղարաբաղի շրջափակման հումանիտար հետեւանքներով

Հայաստանը և Լեռնային Ղարաբաղը միմյանց կապող Լաչինի միջանցքում իրավիճակը կայուն չէ և լարվածություն է ստեղծում, ինչը հակասում է վստահության ամրապնդման այնքան անհրաժեշտ ջանքերին։ ԵՄ բարձր ներկայացուցիչ Ժոզեպ Բորելի անունից հունվարի 18-ին այսպիսի հայտարարություն է արել Տրանսպորտի հարցերով հանձնակատար Ադինա Վալեանը՝ դիմելով Եվրոպական խորհրդարանին։

Դեկտեմբերի 13-ին տարածած հայտարարության մեջ Եվրոպական միությունը կոչ էր արել Ադրբեջանի իշխանություններին ապահովել միջանցքի երկայնքով տեղաշարժի ազատությունն ու անվտանգությունը՝ 2020 թվականի նոյեմբերի 9-ի եռակողմ հայտարարությունից բխող պարտավորություններին համապատասխան։

«Ազատ տեղաշարժի նմանատիպ սահմանափակումները զգալի անհանգստություն են առաջացնում տեղի բնակչության շրջանում: Եվրոպական միությունն ավելի ու ավելի է անհանգստանում սննդի, դեղորայքի և այլ առաջին անհրաժեշտության ապրանքների և բժշկական ծառայությունների պակասի, ինչպես նաև էներգիայի մատակարարման և հեռահաղորդակցության կանոնավոր խափանումների հետևանքով առաջացած բացասական հումանիտար ազդեցությամբ»,- ասել է հանձնակատարը Խորհրդարանին:

Նա հավելել է, որ 2022 թվականին Եվրոպական միությունը հումանիտար նպատակներով հատկացրել է 3,6 միլիոն եվրո ֆինանսավորում, որն ամբողջությամբ տրամադրվել է Կարմիր Խաչի միջազգային կոմիտեին (ԿԽՄԿ), քանզի այն տեղում միակ գործընկերն է, որը կարող է մուտք գործել Լեռնային Ղարաբաղ։ Ծրագիրն ուղղված է տնտեսական անվտանգությանը և ականազերծմանն ուղղված գործողություններին:

Իմացիր ավելին

Մամուլի հաղորդագրություն