«Մատակարարման ամենամեծ ցնցումը առնվազն 1970-ականների սկզբից ի վեր». ՎԶԵԲ-ն ասում է, որ Ուկրաինայի դեմ պատերազմն աճի լուրջ դանդաղեցման կհանգեցնի

«Մատակարարման ամենամեծ ցնցումը առնվազն 1970-ականների սկզբից ի վեր». ՎԶԵԲ-ն ասում է, որ Ուկրաինայի դեմ պատերազմն աճի լուրջ դանդաղեցման կհանգեցնի

1 Ապրիլի, 2022

Ըստ Վերակառուցման և զարգացման եվրոպական բանկի (ՎԶԵԲ) նոր հետազոտության, Ուկրաինայի դեմ պատերազմը լուրջ ազդեցություն կունենա նաև այն տնտեսությունների վրա, որոնք գտնվում են հակամարտության անմիջական տարածքից դուրս:

Պատերազմի սկզբից ի վեր իր առաջին տնտեսական կանխատեսման մեջ ՎԶԵԲ-ը ավելի քան կիսով չափ՝ մինչև 1,7 տոկոս, կրճատել է 2022 թվականի աճի կանխատեսումն իր գործունեության տարածաշրջանների համար, ինչը 2,5 տոկոսով պակաս է նախորդ կանխատեսումից: 2023 թվականի համար այն ավելի կայուն՝ մոտ 5 տոկոս աճ է կանխատեսում իր գործունեության տարածաշրջաններում։

Պատերազմի հետևանքները նկարագրելով որպես «մատակարարման ամենամեծ ցնցումը առնվազն 1970-ականների սկզբից ի վեր»` Բանկը կանխատեսում է, որ այնպիսի ապրանքների թանկացումը, ինչպիսիք են սննդամթերքը, նավթը, գազը և մետաղները, մեծ ազդեցություն կունենա տնտեսությունների վրա, հատկապես՝ ցածր եկամուտ ունեցող երկրների դեպքում։ ՎԶԵԲ-ը հիշեցնում է, որ Ռուսաստանը և Ուկրաինան մեծ մասնաբաժին ունեն բորսային ապրանքների, այդ թվում՝ ցորենի, եգիպտացորենի, պարարտանյութի, տիտանի և նիկելի մատակարարման մեջ։

Թեև անորոշության բարձր աստիճանը պահպանվում է, պարզ է, որ շատ տնտեսություններ լուրջ հարվածներ են կրելու, և որ որոշներն ավելի շատ կտուժեն, քան մյուսները: Օրինակ, ՎԶԵԲ-ը սպասում է, որ Ուկրաինայի ՀՆԱ-ն այս տարի կնվազի 20 տոկոսով՝ 3,5 տոկոսանոց աճի փոխարեն: Ռուսաստանի ՀՆԱ-ն էլ 3 տոկոսանոց աճի փոխարեն կնվազի 10 տոկոսով։

ՎԶԵԲ-ը նաև ճնշում է կանխատեսում կովկասյան և կենտրոնաասիական արժույթների վրա, քանի որ շուկաները գերագնահատում են աշխարհաքաղաքական ռիսկերը և հարվածում են զբոսաշրջությանը բազմաթիվ երկրներում, այդ թվում՝ Հայաստանում և Վրաստանում:

Զեկույցը նաև գնահատում է Եվրոպայում Երկրորդ համաշխարհային պատերազմից հետո մարդկանց ամենամեծ բռնի տեղահանման հնարավոր հետևանքները։

ՎԶԵԲ-ի կարծիքով՝ ուկրաինացի որակավորված աշխատողները երկարաժամկետ հեռանկարում կարող են խթան հաղորդել որոշ տնտեսությունների, մասնավորապես՝ ծերացող բնակչություն ունեցող երկրներում: Կարճաժամկետ հեռանկարում տնտեսությունները գործ կունենան հարկաբյուջետային ճնշումների և վարչական մարտահրավերների հետ՝ բնակարանային, առողջապահական և կրթական ծառայությունների ապահովմամբ պայմանավորված:

ՎԶԵԲ-ի կանխատեսումներով հրադադար կհաստատվի մի քանի ամսվա ընթացքում, որից անմիջապես հետո կսկսվի Ուկրաինայի ծավալուն վերակառուցման գործընթաց, ինչի արդյունքում երկրի ՀՆԱ-ն 2023 թվականի վերջի դրությամբ կմոտենա, բայց դեռևս չի հասնի նախապատերազմյան մակարդակին։

Սպասվում է, որ Ռուսաստանի դեմ պատժամիջոցները տեսանելի ապագայում կպահպանվեն՝ 2023 թվականին ռուսական տնտեսությանը դատապարտելով լճացման (2022 թվականին ՀՆԱ-ի կտրուկ անկումից հետո), ինչը բացասական հետևանքներ կունենա Արևելյան Եվրոպայի, Կովկասի և Կենտրոնական Ասիայի մի շարք հարևան երկրների համար:

Այսքան անորոշությունների պայմաններում Բանկը մտադիր է առաջիկա մի քանի ամիսների ընթացքում կատարել հետագա կանխատեսումներ՝ հաշվի առնելով հետագա զարգացումները։

Իմացիր ավելին

Մամուլի հաղորդագրություն

ՎԶԵԲ-ը փակում է իր գրասենյակները Մոսկվայում և Մինսկում

ՎԶԵԲ-ը ներկայացնում է 2 միլիարդ եվրո արժեքով դիմակայունության փաթեթ՝ ի պատասխան Ուկրաինայի դեմ պատերազմի




Հետաքրքրվա՞ծ եք վերջին նորություններով ու հնարավորություններով

Այս կայքը կառավարվում է 2020-2024թթ. համար Եվրամիության կողմից ֆինանսավորվող Արևելյան հարևանության տարածաշրջանային հաղորդակցության ծրագրի («ԵՄ արևելյան հարևաններ») կողմից: Ծրագիրը լրացնում և աջակցում է գործընկեր երկրներում ԵՄ պատվիրակությունների հաղորդակցական գործունեությանն ու աշխատում է Եվրոպական հանձնաժողովի Հարևանության քաղաքականության և ընդլայնման բանակցությունների գլխավոր տնօրինության ու ԵՄ արտաքին գործողությունների ծառայության ղեկավարության ներքո: Ծրագիրն իրականացնում է B&S Europe-ի գլխավորած կոնսորցիումը:

Սույն կայքում առկա տեղեկատվությունը կարգավորվում է պատասխանատվության սահմանափակման և անձնական տվյալների պաշտպանության մասին դրույթներով:
© Եվրոպական միություն,