На Грамадзянскім саміце Усходняга партнёрства 2025 года запусцілі новую рэгіянальную праграму супраць дэзінфармацыі коштам 5 мільёнаў еўра

На Грамадзянскім саміце Усходняга партнёрства 2025 года, які праходзіў ад 2 да 4 снежня ў Бруселі, была запушчана новая рэгіянальная праграма коштам 5 мільёнаў еўра. Яна накіравана на выяўленне і супрацьдзеянне замежным інфармацыйным маніпуляцыям, умяшанню і дэзінфармацыі ў рэгіёне Усходняга партнёрства.

Праграма прынясе карысць арганізацыям грамадзянскай супольнасці і незалежным медыя ў Арменіі, Азербайджане, Беларусі, Грузіі, Малдове і Украіне, а таксама тым арганізацыям, што працуюць у выгнанні. Праграма будзе сканцэнтравана на ўмацаванні патэнцыялу ў сферы стратэгічных камунікацый, павышэнні медыяпісьменнасці і супрацьдзеянні дэзінфармацыі. Дзеянні падчас праграмы будуць уключаць павышэнне патэнцыялу, даследаванні і аналітыку, умацаванне трансгранічнай устойлівасці і фінансавую падтрымку.

 «Аўтакраты распаўсюджваюць дэзінфармацыю, каб аслабіць нашы дэмакратычныя грамадствы. Мы сутыкаемся з аднолькавымі пагрозамі ў дзяржавах-членах ЕС і суседніх краінах», — сказала камісарка па пытаннях Пашырэння Марта Кос. «Каб абараніць свабоду і дэмакратыю ў Еўропе, усім еўрапейцам неабходна працаваць разам. Незалежныя медыя і актыўная грамадзянская прастора ў нашым суседстве — гэта частка еўрапейскай дэмакратычнай сістэмы бяспекі».

Камісарка Кос таксама прыняла ўдзел у цырымоніі ўручэння Прэміі грамадзянскай супольнасці — штогадовай узнагароды, якую Форум грамадзянскай супольнасці Усходняга партнёрства прысуджае за выбітную і адважную працу асоб або арганізацый рэгіёна. Яна ўручыла прэміі 2025 года Радзе замежнай палітыкі «Ukrainian Prism» і Жаночай асацыяцыі за рацыянальнае развіццё (WARD) з Азербайджана.

«Ukrainian Prism» — аналітычны цэнтр, які спецыялізуецца на знешняй палітыцы і міжнароднай бяспецы, — была ўзнагароджана за сваю няспынную дзейнасць, нягледзячы на разбуральныя наступствы расійскай агрэсіўнай вайны.

WARD — арганізацыя грамадзянскай супольнасці з Азербайджана, якая адстойвае гендарную роўнасць, пашырэнне магчымасцяў і ўдзел жанчын, — была прызнана за намаганні ў прасоўванні гендарнай роўнасці для ўсіх жанчын і мужчын, дзяўчат і хлопцаў у краіне.

Грамадзянскі саміт Усходняга партнёрства 2025 года — гэта штогадовая падзея, якая аб’ядноўвае арганізацыі грамадзянскай супольнасці ЕС і Усходняга партнёрства, а таксама асоб, што прымаюць рашэнні, для абмеркавання будучай формы шматбаковага супрацоўніцтва ў рамках Усходняга партнёрства, ролі грамадзянскай супольнасці і шляхоў умацавання яе ўстойлівасці.

Даведацца больш

Прэс-рэліз