Украіна падала заяўку на ўступленне ў ЕС 28 лютага 2022 года. 17 чэрвеня 2022 года Еўрапейская камісія апублікавала сваё заключэнне адносна заяўкі. Грунтуючыся на рэкамендацыях Еўракамісіі, Еўрапейская рада 23 чэрвеня 2022 года прызнала еўрапейскую перспектыву Украіны і надала ёй статус краіны-кандыдата. 8 лістапада 2023 года ў рамках свайго Пакету пашырэння Еўрапейская камісія апублікавала справаздачу па Украіне і рэкамендавала пачаць перамовы аб уступленні.

Справаздача па Украіне

У камюніке аб пашырэнні ЕС на 2023 год Еўрапейская камісія заявіла, што Украіна дамаглася істотнага прагрэсу ў рэалізацыі сямі ключавых рэформаў, вызначаных на 2022 год.

"Камісія лічыць, што Украіна ў дастатковай ступені адпавядае крытэрам, што тычацца стабільнасці інстытутаў, якія гарантуюць дэмакратыю, вяршэнства права, правоў чалавека і павагі і абароны меншасцяў", – гаворыцца ў камюніке ЕК.

У справаздачы адзначаецца, што ў краіне была створаная празрыстая сістэма папярэдняга адбору суддзяў Канстытуцыйнага суда і праведзеная рэформа органаў судовага кіравання. У ёй таксама падкрэсліваецца, што Украіна паслядоўна ідзе шляхам расследавання справаў карупцыі на высокім узроўні і вынясення абвінаваўчых выракаў па іх, і што яна зрабіла пазітыўныя крокі ў рамках больш шырокіх і сістэмных намаганняў па барацьбе з уплывам алігархаў. Паводле Еўракамісіі, Украіна таксама прадэманстравала сваю здольнасць дамагацца прагрэсу ў дастасаванні да заканадаўства ЕС нават у ваенны час. 

Больш падрабязна пра асноўныя высновы справаздачы тут.

Шлях Украіны ў ЕС 

Статус краіны-кандыдата быў нададзены пры ўмове, што Украіна зробіць некалькі ключавых крокаў. Камісія сачыць за іх ажыццяўленнем і прымае адпаведную справаздачу  ў рамках свайго рэгулярнага Пакету пашырэння. 

Націснуць тут, каб даведацца больш пра падтрымку Украіны з боку ЕС і яе шляху да ўступлення ў ЕС.

Рэспубліка Малдова падала заяўку на ўступленне ў ЕС у сакавіку 2022 года.  17 чэрвеня 2022 года Еўрапейская камісія апублікавала сваё заключэнне адносна заяўкі. Грунтуючыся на рэкамендацыях Еўракамісіі, Еўрапейская рада 23 чэрвеня 2022 года прызнала еўрапейскую перспектыву Малдовы і надала ёй статус краіны-кандыдата. 8 лістапада 2023 года ў рамках свайго Пакету пашырэння Еўрапейская камісія апублікавала справаздачу па Малдове і рэкамендавала пачаць перамовы аб уступленні.

Справаздача па Малдове

У камюніке аб пашырэнні ЕС на 2023 год Еўрапейская камісія заявіла, што Малдова дамаглася істотнага прагрэсу ў рэалізацыі дзевяці крокаў, вызначаных ЕК на 2022 год.

"Камісія лічыць, што Малдова ў дастатковай ступені адпавядае крытэрам, што тычацца стабільнасці інстытутаў, якія гарантуюць дэмакратыю, вяршэнства права, правоў чалавека і павагі і абароны меншасцяў", - гаворыцца ў камюніке.

У справаздачы адзначаецца, што краіна распачала комплексную рэформу судовай сістэмы. У ёй падкрэсліваецца, што Малдова рэфармавала свае антыкарупцыйныя органы і павялічыла колькасць расследаванняў і вынясення абвінаваўчых выракаў у справах аб карупцыі, а таксама прыняла і ўкараніла План дзеянняў па дэаліхархізацыі і зрабіла захады па барацьбе з арганізаванай злачыннасцю. У справаздачы таксама пазначаецца, што краіна прыняла стратэгію дзяржаўнага кіравання і распачала працу над рэфармаваннем кіравання дзяржаўнымі фінансамі і дзяржаўнымі закупкамі. Еўракамісія таксама адзначыла, што Малдова пашырыла ўдзел грамадзянскай супольнасці ў працэсе прыняцця рашэнняў і ўзмацніла абарону правоў чалавека. 

Больш падрабязна пра асноўныя высновы справаздачы тут.

Шлях Малдовы ў ЕС 

28 чэрвеня 2023 года Старшыня ЕК Урсула фон дэр Ляен прадставіла Пакет падтрымкі Рэспублікі Малдова, дзе змяшчаліся пяць прыярытэтаў, накіраваных на ліквідацыю наступстваў агрэсіўнай вайны Расіі супраць Украіны і збліжэнне Малдовы з Еўрапейскім саюзам.

Націснуць тут, каб даведацца больш пра падтрымку Малдовы з боку ЕС і яе шляху да ўступлення ў ЕС.

Грузія падала заяўку на ўступленне ў ЕС у сакавіку 2022 года. 17 чэрвеня 2022 года Еўрапейская камісія апублікавала сваё заключэнне адносна заяўкі. Грунтуючыся на рэкамендацыях Еўракамісіі, Еўрапейская рада 23 чэрвеня 2022 года прызнала еўрапейскую перспектыву Грузіі і прапанавала надаць ёй статус краіны-кандыдата, як толькі будуць выкананыя пэўныя ўмовы. 8 лістапада 2023 годаў рамках свайго Пакету пашырэння Еўрапейская камісія рэкамендавала Радзе надаць Грузіі статус краіны-кандыдата пры ўмове, што Грузія зробіць шэраг важных крокаў.

Еўракамісія вітала намаганні па рэфармаванні, прынятыя Грузіяй у адпаведнасці з Канстытуцыяй краіны, якая прадугледжвае яе інтэграцыю ў ЕС у якасці прыярытэту для краіны. 

Справаздача па Грузіі

У справаздачы Еўрапейскай камісіі па Грузіі за 2023 год адзначаецца, што ў сувязі з дванаццаццю прыярытэтамі, названымі ў яе першапачатковым заключэнні ад чэрвеня 2022 года, Грузія прыняла заканадаўчыя акты і палітычныя дзеянні адносна забеспячэння гендарнай роўнасці і барацьбы з гвалтам у дачыненні да жанчынаў, уліку рашэнняў Еўрапейскага суду па правах чалавека ў рашэннях грузінскіх судоў і змагання х арганізаванай злачыннасцю. Грузія таксама прызначыла новага Ўпаўнаважанага па абароне правоў (Амбудсмена). Аднак у справаздачы падкрэслівалася, што працэсу рэформаў перашкаджалі працяглая палітычная напружанасць, глыбокая палярызацыя і праблемы дасягнення кансенсусу па ключавых пытаннях, што складаюць нацыянальны інтарэс.

Камісія рэкамендавала надаць Грузіі статус краіны-кандыдата пры ўмове, што будуць зробленыя належныя дзеянні ў шэрагу сфераў, у тым ліку: барацьба з дэзынфармацыяй і маніпуляваннем з боку знешніх сілаў, лепшае дастасаванне да агульнай знешняй палітыкі і палітыцы бяспекі ЕС, вырашэнне праблемы палітычнай палярызацыі, забеспячэнне свабоднага, справядлівага і канкурэнтнага выбарчага працэсу і забеспячэнне сістэмнага падыходу да дэаліхархізацыі і правядзенне цэласнай і эфектыўнай судовай рэформы.

Больш падрабязна пра асноўныя высновы справаздачы тут.

Шлях Грузіі ў ЕС

Цягам апошніх месяцаў Грузія распачала крокі па ўмацаванні ўзаемадзеяння з ЕС і паскорыла тэмпы рэформаў, каб выканаць дванаццаць прыярытэтніх задачаў, вызначаных у Заключэнні Еўракамісіі адносна яе заяўкі на ўступленне.

У святле дасягнутых вынікаў Еўрапейская камісія рэкамендуе Радзе надаць Грузіі статус краіны-кандыдата пры ўмове, што будзе зроблены шэраг крокаў.

Націснуць тут, каб даведацца больш пра падтрымку Грузіі з боку ЕС і яе шляху да ўступлення ў ЕС. 

Як праходзяць перамовы?

Перамовы

Перамовы падзеленыя на 35 перамоўных раздзелаў, згрупаваных у 6 тэматычных блокаў. Перамовы па кожным блоку пачынаюцца ў цэлым пасля таго, як краіна выканае пачатковыя кантрольныя паказчыкі. Праца над кожным раздзелам вядзецца паасобку.  

Асновы

Перамовы па асновах адкрываюцца першымі і завяршаюцца апошнімі; прагрэс па гэтым блоку вызначае агульны тэмп перамоваў.