„შემოქმედებითი ევროპა“ თანამშრომლობის პროექტების კონკურსს აცხადებს — განაცხადები საქართველოდანაც მიიღება

ევროკავშირის პროგრამა, „შემოქმედებითი ევროპა“, თანამშრომლობის პროექტების კონკურსს აცხადებს. სხვადასხვა მასშტაბის გრანტები იმ ინიციატივების განმახორციელებელი პროექტებისთვის გაიცემა, რომლებშიც კულტურულ თუ შემოქმედებით სექტორებში მომუშავე ხელოვანები და დაინტერესებული პირები არიან ჩართულნი.

60 მილიონი ევროს ბიუჯეტის მქონე კონკურსი კულტურის სფეროს ორგანიზაციების თანამშრომლობას შეუწყობს ხელს. შედეგად, ის წაახალისებს ევროპული ხელოვნების ნიმუშთა გავრცელებას და ახალი, ინოვაციური პრაქტიკების დანერგვასა და განვითარებას. 

პრიორიტეტი მიენიჭება პროექტებს, რომლებიც მიზნად ისახავს აუდიტორიის მოზიდვას, სოციალური ჩართულობის გაზრდას, ციფრულ გარდაქმნას, ეკომეგობრული მიდგომების წახალისებას და საერთაშორისო ასპარეზზე გასვლას (კონკურსში მონაწილე პროექტი ამ პრიორიტეტებიდან მინიმუმ ერთს მაინც უნდა აკმაყოფილებდეს). საპროექტო წინადადებებში მაქსიმალურად უნდა იყოს გათვალისწინებული უკრაინის ომის გავლენა მის მოსახლეობაზე და ქვეყნის კულტურის და შემოქმედებით სექტორებზე.

კონკურსში მონაწილეობა შეუძლიათ იურიდიულ პირებს (საჯარო ან კერძო ორგანიზაციებს) „შემოქმედებითი ევროპის“ ქვეყნებიდან, რომელთა შორის საქართველო, სომხეთი და უკრაინაც არის.

პროგრამა მცირე, საშუალო და ფართო მასშტაბის 130 პროექტს დააფინანსებს.

განაცხადების შეტანის ბოლო ვადაა 2023 წლის 23 თებერვალი. 

დამატებითი ინფორმაცია

პრესრელიზი