საერთო წარსულის გააზრება:  EU4Dialogue საზაფხულო სკოლაში სამხრეთკავკასიელ და მოლდოველ ისტორიკოსებს იწვევს 

ევროკავშირის მიერ დაფინანსებული EU4Dialogue პროექტი სამხრეთკავკასიელი და მოლდოველი ახალგაზრდა ისტორიკოსებისათვის საზაფხულო სკოლას აწყობს. საზაფხულო სკოლა, „ისტორია vs. ისტორიები: ინტერაქტიური მიდგომა საერთო წარსულის გასააზრებლად“,  2023 წლის 12-18 აგვისტოს ფინეთის ქალაქ ტამპერეს მახლობლად ჩატარდება.

კონკურსს პროექტი, „EU4Dialogue: საზღვრებსშორისი გაცვლების გაუმჯობესება განათლებისა და კულტურის საშუალებით“, და ტამპერეს უნივერსიტეტში არსებული მშვიდობის კვლევების ინსტიტუტი (TARPI) აცხადებენ. 

საგანმანათლებლო ინიციატივის მიზანია, ხელი შეუწყოს სამხრეთკავკასიელ და მოლდოველ მომავალ თუ დამწყებ ისტორიკოსებს შორის გაცვლებს, კავშირების დამყარებასა და თანამშრომლობას.  ამ გზით ახალბედა მკვლევრები მიიღებენ პროფესიულ გამოცდილებას და გაიღრმავებენ ცოდნას ისტორიის სწავლის, სწავლებისა თუ წარმოჩენის ალტერნატიულ მეთოდებზე. საზაფხულო სკოლის მიერ შეთავაზებული სასწავლო თემები მათ დაეხმარება, დაძლიონ კონფლიქტის გამომწვევი ნარატივები და ისტორიას არაკონფლიქტური რაკურსებიდან შეხედონ. 

საზაფხულო სკოლაში მონაწილეობა შეუძლიათ ისტორიასთან დაკავშირებულ დისციპლინებში მომუშავე მაღალ საფეხურზე მყოფ მაგისტრანტებს ან დოქტორანტებს (1-ელი ან მე-2 წელი) სამხრეთ კავკასიიდან და მოლდოვიდან (მათ შორის კონფლიქტებით დაზარალებული რეგიონებიდან). კანდიდატებს ინგლისურ ენაზე სწავლა და კომუნიკაცია უნდა შეეძლოთ.

საზაფხულო სკოლაში მონაწილეობის ყველა საფასურს, მათ შორის სამგზავრო, საცხოვრებელ, კვების და ექსკურსიების ხარჯებს, ევროკავშირის მიერ დაფინანსებული პროექტი სრულად დაფარავს.

განაცხადების შეტანის ბოლო ვადაა 2023 წლის 8 მაისი.

დამატებითი ინფორმაცია

პრესრელიზი