ლორენცო ნატალის სახელობის მედია-პრიზზე განაცხადები 30 ივნისამდე მიიღება 

ევროკავშირის საფლაგმანო ჟურნალისტურ კონკურსზე, ლორენცო ნატალის სახელობის მედია-პრიზზე განაცხადების მიღება დაიწყო. მასში მონაწილეობა საქართველოში მომუშავე მედიაორგანიზაციებსა და ჟურნალისტებსაც შეუძლიათ.

კონკურსი მსოფლიოს სხვადასხვა წერტილში მომუშავე იმ ჟურნალისტების შრომას აფასებს, რომლებიც ყველაზე მნიშვნელოვან საკითხებს აშუქებენ.

ევროკომისია კონკურსში იწვევს ჟურნალისტებს, რომლებიც მუშაობენ ისეთ თემებზე, როგორებიცაა უთანასწორობა, სიღარიბის აღმოფხვრა, მდგრადი განვითარება, გარემოსდაცვა, ბიომრავალფეროვნება, კლიმატის ცვლილება, ციფრული გარდაქმნა, სამუშაო ადგილები და დასაქმება, განათლება და უნარების განვითარება, მიგრაცია, ჯანდაცვა, მშვიდობა, დემოკრატია და ადამიანის უფლებები. განაცხადები ონლაინ მიიღება. 

ჟურნალისტებს წერილობითი, აუდიოვიზუალური ან მულტიმედიური ნაშრომის წარდგენა ამ კატეგორიებში შეუძლიათ:

• საუკეთესო დამწყები ჟურნალისტის პრიზი: რეპორტაჟისთვის, რომლის ავტორიც განაცხადის წარდგენის მომენტში 18-25 წლის ასაკის იყო.
• საგამოძიებო ჟურნალისტიკის პრიზი: რეპორტაჟისთვის, რომელიც აშუქებს ისეთ მნიშვნელოვან საკითხებს, როგორიცაა დანაშაული, უსამართლობა, კორუფცია ან კორპორაციული დანაშაული, და რომლის მიზანიც ამ შემთხვევების შესახებ საზოგადოების ინფორმირებაა. 
• სიღრმისეული ჟურნალისტიკის პრიზი: რეპორტაჟისთვის, რომლის მიზანიცაა საზოგადოების გართობა, განათლება ან ინფორმირება. 
• სპეციალური პრიზი: 2024 წლის კონკურსი დააჯილდოებს ფოტოჟურნალისტიკის ნამუშევარს, რომელიც კონკურსში მონაწილეობის უფლების მქონე ქვეყანაში დაფუძნებულმა მედიასაშუალებამ გამოაქვეყნა. 

კონკურსზე მიიღება ნებისმიერ ენაზე შესრულებული რეპორტაჟი — იმ პირობით, რომ მას თან დაერთვება ინგლისურ, ფრანგულ, ესპანურ, გერმანულ ან პორტუგალიურ ენაზე შესრულებული თარგმანი.

თითოეული გამარჯვებული პრიზის სახით 10,000 ევროს მიიღებს. გარდა ამისა, საუკეთესო დამწყები ჟურნალისტის პრიზის მფლობელს პროექტის პარტნიორ მედიასაშუალებაშიც შესთავაზებენ სტაჟირებას.

გამარჯვებულებს 2024 წლის მეორე ნახევარში ბრიუსელში, ლორენცო ნატალის სახელობის მედია-პრიზის დაჯილდოების ცერემონიაზე გამოაცხადებენ. 

განაცხადების შეტანის ბოლო ვადაა 30 ივნისი.

დამატებითი ინფორმაცია

პრესრელიზი

ლორენცო ნატალის პრიზი 2024 — 32-ე კონკურსი