გურიაში, კახეთსა და ქვემო ქართლში მცხოვრებთათვის დისტანციურად მუშაობის თემაზე ტრენინგი გამოცხადდა

საქართველოს სტრატეგიული კვლევებისა და განვითარების ცენტრი (CSRDG), ევროკავშირის მხარდაჭერით, დისტანციურად დასაქმების მსურველებისთვის უფასო ტრენინგკურსს იწყებს. 

კურსის გამვლელები გაიგებენ, რა შესაძლებლობები არსებობს დისტანციური დასაქმებისა თუ ფრილანსერობისთვის და გაეცნობიან შესაბამის პლატფორმებს. მათ აუხსნიან, როგორ განვითარდნენ პროფესიულად ისეთ სფეროებში, როგორიცაა პროგრამირება, გრაფიკული დიზაინი, კოპირაიტინგი, ციფრული მარკეტინგი თუ სოციალური მედიის მართვა. ისინი, ამასთან, საქმიანი კომუნიკაციისა და შემოსავლის მართვის საფუძვლებსაც შეისწავლიან.

კურსზე დასწრების მსურველმა უნდა დააკმაყოფილოს შემდეგი კრიტერიუმები:

• უკვე შეუსრულდა 16 წელი;
• ცხოვრობს გურიაში, კახეთში ან ქვემო ქართლში;
• აქვს კომპიუტერი და ინტერნეტი;
• იცის ინგლისური მინიმუმ A2 დონეზე.

კურსი შედგება ათი შეხვედრისგან. მისი წარმატებით გავლის შემთხვევაში მონაწილეს სხვა პროფესიული კურსისთვის თანადაფინანსების მიღების შანსი მიეცემა.

განაცხადების შეტანის ბოლო ვადაა 2023 წლის 20 აგვისტო.

დამატებითი ინფორმაცია

პრესრელიზი