Copernicus Masters კონკურსი: დედამიწაზე დაკვირვების სფეროში შემოქმედებითი იდეის ავტორი 10,000-მდე ევროს მიიღებს

ევროპული კოსმოსური სააგენტო (ESA) აცხადებს კონკურსს, ESA Copernicus SpaceLeap Challenge. კონკურსანტებმა უნდა წარადგინონ იდეა, რომელიც კოსმოსური საინფორმაციო პროდუქტებისა და მომსახურების დახვეწის გზით დედამიწაზე დაკვირვების (EO) საერთაშორისო ბაზრის განვითარებას შეუწყობს ხელს. 

კონკურსი ევროკავშირის და ESA-ს საფლაგმანო ინიციატივის, Copernicus Masters, ფარგლებშია ორგანიზებული. მისი მიზანი გარემოს გლობალურად — განსაკუთრებით კი, ევროპის მასშტაბით — მონიტორინგისთვის კოსმოსური ინფრასტრუქტურის გამოყენებაა. 

საკონკურსო განაცხადების შეტანა შეუძლიათ კანდიდატებს ევროპის ფარგლებს გარეთ მდებარე ქვეყნებიდანაც — კერძოდ, აღმოსავლეთ პარტნიორობის რეგიონიდან (აზერბაიჯანი, მოლდოვა, საქართველო, სომხეთი და უკრაინა). 

3 საუკეთესო განაცხადის ავტორებიდან თითოეული 5,000 ევროს ოდენობის ფულადი პრიზით დაჯილდოვდება. Copernicus Masters კონკურსის 2022 წლის მთავარი გამარჯვებული კი 10,000 ევროს მიიღებს.

კონკურსი, ESA Space LeapChallenge, წინადადებებს საწარმოებიდან, სამეცნიერო დაწესებულებებიდან და სრულწლოვანი ინდივიდებისგან იღებს. ამასთან, აპლიკანტებს მოქალაქეობა, მუდმივი საცხოვრებელი ადგილი თუ შტაბ-ბინა იმ ქვეყანაში უნდა ჰქონდეთ, რომელსაც Copernicus-ის თანამშრომლობის ხელშეკრულებაზე აქვს ხელი მოწერილი. ეს ხელშეკრულება Copernicus-ის მონაცემებზე წვდომის ქონას და დედამიწაზე დაკვირვებით მიღებულ მონაცემთა გაცვლას ითვალისწინებს. 

განაცხადების შეტანის ბოლო ვადაა 11 ივლისი.

დამატებითი ინფორმაცია

პრესრელიზი