თბილისის ევროკლუბი დედაქალაქის სკოლებს ინიციატივაში ჩართვისაკენ მოუწოდებს

29 მარტს ევროკავშირის მიერ დაფინანსებულმა თბილისის ევროკლუბმა დედაქალაქის სკოლების დირექტორებს უმასპინძლა. შეხვედრის მიზანი დირექტორებისთვის ევროკლუბებისა და ახალგაზრდა ევროპელი ელჩების ინიციატივის შესახებ ინფორმაციის მიწოდება იყო.

ათზე მეტი სკოლის დირექტორის გარდა, შეხვედრას ევროკომისიის, საქართველოში ევროკავშირის წარმომადგენლობის, ევროკავშირის აღმოსავლეთ სამეზობლოს პროექტისა და ახალგაზრდა ევროპელი ელჩების ქსელის წარმომადგენლებიც დაესწრნენ. დირექტორები არა მხოლოდ ინიციატივის პრინციპებსა და საქმიანობას გაეცნენ, არამედ ისიც გაიგეს, თუ როგორ შეუძლიათ მათ მოსწავლეებს სკოლებში ევროკლუბების ორგანიზება და მათში მონაწილეობა.

გასული სექტემბრიდან მოყოლებული, თბილისის ევროკლუბი 1990-იანი წლების შუა პერიოდში დაარსებული კერძო სკოლის, „ლომისი 1-ის“ სივრცეში მდებარეობს. „ევროკლუბის გახსნამ ძალზე დადებითი გავლენა იქონია მოსწავლეებზე. სკოლაში მათი ჩართულობის დონე მნიშვნელოვნად გაიზარდა და აკადემიური მოსწრებაც კი გაუმჯობესდა. კლუბმა მათ სტიმული და მოტივაცია მისცა და იმის რწმენაც ჩაუნერგა, რომ წინ ნათელი მომავალი ელით“, — განაცხადა სკოლის დირექტორმა, თამარ ბარძიმაშვილმა. 

მან ასევე დაურთო, რომ ევროკლუბი იზიარებს მის მიზანს, შექმნას საგანმანათლებლო მიდგომა, რომელიც სწავლის პროცესს ნაკლებად სტრესულს და მეტად სახალისოს გახდის. „განათლება უნდა იყოს გზა ბედნიერებისა და თავისუფლებისკენ“, — აღნიშნა თამარ ბარძიმაშვილმა.