„შენი ევროპა, შენი სათქმელი!“ – ახალგაზრდა ევროპელები ევროკავშირის მომავალი ახალგაზრდული სტრატეგიის შექმნაში მონაწილეობენ

ევროპის ეკონომიკურმა და სოციალურმა კომიტეტმა (EESC) საქართველოს, მოლდოვისა და უკრაინის სკოლებს 19-20 მარტს ბრიუსელში გამართულ ყოველწლიურ ღონისძიებაზე, „შენი ევროპა, შენი სათქმელი!“ (YEYS), უმასპინძლა. ღონისძიება ეძღვნებოდა თემას „აზრიანი კავშირები, აქტიური მონაწილეობა და დემოკრატიული ჩართულობა“. 

ღონისძიებაზე თავი მოიყარა 140-მდე მონაწილემ, რომელთა შორისაც იყვნენ საშუალო სკოლის მოსწავლეები და მათი მასწავლებლები და ახალგაზრდულ ორგანიზაციებთან დაკავშირებული ახალგაზრდები. YEYS-ის ინტერაქტიურ სამუშაო შეხვედრებზე, გაცნობით აქტივობებსა და ჯგუფურ დისკუსიებზე დამსწრეებმა იმსჯელეს იმაზე, თუ რა გზებითაა შესაძლებელი ახალგაზრდების დემოკრატიულ პროცესებში მეტად აქტიურად ჩართვა და ინკლუზიური დიალოგის ხელშეწყობა. 

„ახალგაზრდების ჩართულობა ჩემი მანდატის უმთავრესი პრიორიტეტია“, – განაცხადა EESC-ის პრეზიდენტმა, შაიმუს ბოლანდმა, – „EESC-ში ჩვენ გვჯერა, რომ ახალგაზრდები ევროპის მომავლის მთავარი შემოქმედები უნდა იყვნენ. ამიტომ სასიცოცხლოდ მნიშვნელოვანია ისეთი სივრცეების შექმნა, სადაც ისინი შეხვედრას, იდეების გაზიარებას, შეხედულებათა გადახედვასა და პრობლემების დასაძლევი გზების დასახვას შეძლებენ“. 

YEYS-ის უკანასკნელ სესიაზე ახალგაზრდებისგან შემდგარმა ჯგუფებმა წინადადებები წარადგინეს, რომლებიც ევროკომისიას გადაეცემა ევროკავშირის იმ მომდევნო ახალგაზრდული სტრატეგიის შემუშავების დროს გასათვალისწინებლად, რომელიც 2027 წლის მარტში გამოქვეყნდება.

„ევროკომისიისთვის ახალგაზრდობა მისი არსებობის პირველივე დღიდან არის პოლიტიკური პრიორიტეტი“, – განაცხადა თაობათაშორისი სამართლიანობის, ახალგაზრდობის, კულტურისა და სპორტის კომისარმა, გლენ მიკალეფმა, თავის ვიდეოშეტყობინებაში. 

YEYS-ის გუნდმა 27 წევრი სახელმწიფოდან, ცხრა კანდიდატი ქვეყნიდან და გაერთიანებული სამეფოდან შესული 515 სასკოლო და 2,596 ინდივიდუალური განაცხადიდან 37 სკოლა (თითო ყველა ქვეყნიდან) და 43 ინდივიდუალური მონაწილე შეარჩია. საქართველოდან ღონისძიებას მწვანე სკოლა (დიღომი, თბილისი) დაესწრო. 

დამატებითი ინფორმაცია

პრესრელიზი